MAPALAMBO pa ang maayong serbisyo ug dunay pagsinabtanay tali sa gobiyerno sa nasod ug simbahan, ang birthday wishes ni Cebu Archbishop Emeritus Ricardo Cardinal Vidal nga nagsaulog sa ika-86 nga kasumaran sa iyang adlaw nga natawhan kagahapon.
“If we will not harmonize our understanding and our activities then where will peace come...” pamulong sa retirado nga arsobispo sa Sugbo.
Matod niya nga sa mga nahitabo sa palibot karon sama sa pagpamatay sa mga nalambigit sa ginadili nga drugas, mahinungdanon ang kalinaw sa katilingban sama sa natagamtaman dinhi sa Sugbo.
Ang Catholic Bishops Conference of the Philippines niluwat og pastoral statement nga nipadayag og pagsupak sa mga nahitabo extrajudicial killings sa nasod.
“This traffic in illegal drugs needs to be stopped and overcome. But the solution does not lie in the killing of suspected drug users and pushers,” matod sa tulo ka pahina nga pastoral statement nga pirmado ni Lingayen-Dagupan Arsobispo Socrates Villegas, presidente sa CBCP niadtong Enero 30, 2017.
Si Villegas niingon nabalaka ang mga obispo sa nagkasaka nga gidaghanon sa mga krimen may kalambigitan sa ginadili nga drugas.
Matod ni Vidal nga sila mga pro-life hinungdan nga supak sila sa extrajudicial killings ug padayon nga naghigugma sa kamahinungdanon sa kinabuhi.
Si Villegas niawhag ang mga Pinoy ug matuohon nga mosubay sa mga pagtulon-an sa simbahan.
Ang pastoral statement gipangbasa sa mga misa sa simbahang Katoliko sa nasod kagahapon.
Si Vidal niasoy nga nakadawat siya og kopya sa maong pastoral statement ug iya kining gipabasa sa sakristan human sa iyang wali.
Bisan sa mga pagpanaway ni Presidente Rodrigo Duterte batok sa pipila ka mga opisyal sa simbahang Katoliko, ang Cardinal namahayag nga sila sa simbahan ug ang katawhang obligado nga mag-ampo alang sa presidente.
“..whether we like him or not. Since he came out of the election, then we have to accept it. Let us cooperate in whatever we can,” dugang ni Vidal sa pakighinabi sa mga tigbalita.
Si Vidal nipadayag nga ang ang problema sa panagsabot sa kalinaw tali sa gobiyerno ug mga rebeldeng pundok mao nga matag usa dunay kaugalingon nga panghunahuna ug nagkuwang og pagsabot sa kasingkasing.
“Any relationship without heart, what kind of relationship is that,” dugang sa Cardinal.