MAMAHIMO na unya nga P366 ang minimum nga sweldo sa mga mamumuo sa pribadong sektor matag adlaw sa Metro Cebu.
Ang Regional Tripartite Wages and Productivity Board sa Central Visayas nagkauyon nga dungagan og P13 ang minimum nga suhulan sa mga trabahante sa Metro Cebu human sa deliberasyon kagahapon nga nagsugod pasado alas 8 sa buntag ug natapos alas 2 sa hapon.
Si Exequiel Sarcauga, regional director sa Department of Labor and Employment (Dole) 7, niingon nga nasabutan usab sa board nga himuong P3,000 gikan sa P2,500 ang minimum nga sweldo sa mga kasambahay o katabang sa panimalay sa highly urbanized cities, samtang P2,500 gikan sa P2,000 sa mga lugar nga gawas sa urbanized cities.
Matod niini ang P13 nga nauyonang umento iduso pa ngadto sa National Wages and Productivity Commission sa kaulohan alang sa pag-aprobar sa dili pa kini ipublikar sa mantalaan ug ipatuman human sa 15 ka adlaw gikan sa publication.
Si Atty. Jonas Asis sa Associated Labor Union- Trade Union Congress of the Philippines, niingon nga ang P13 gilaoman na nila nga maoy kantidad tungod kay mao lang kini ang kaya mahatag sa RTWPB 7.
“P13 ra gyud ang naa sa ilang hunahuna, anha ra gyud na magduwa,” padayag ni Asis dihang nahinabi sa sibyaanang dyLA kagahapon.
Iyang gihulagway nga daw sa ‘flashback’ sa 2015 ang dugang P13 nga sweldo sa mga mamumuo nga nauyonan sa board karong tuiga.
Niadtong 2015, P13 usab ang gihatag nga usbaw sa suhulan sa mga mamumuo diin gikan sa P340 nahimo nang P353.
Si Sarcauga, chairman sa RTWPB 7, nagkanayon nga magtagbo og balik ang mga sakop sa board karong Pebrero 13, aron desisyonan kon ipatuman ba ang umento sa tanang lugar sa Central Visayas apil ang Bohol, Siquijor ug ubang bahin sa Sugbo.
Si Sarcauga namahayag nga ang P13 nga umento sa sweldo, gibase sa purchasing power, consumer price index ug average erosion sa rehiyon base sa mga datos ug impormasyon nga nahipos sa board.
Matod niya nga base sa computation sa management sektor, P10 lang ang kaya mahatag nga usbaw, apan gisupak kini sa representante sa labor sector sa board nga niduso og P16.
Tungod niini, si Sarcauga nisugyot og P13 nga usbaw, nga nauyonan sa tanang mga miyembro sa board.
Matod ni Atty. Ernesto Carreon, representante sa labor sa RTWPB 7, nga nisupak si Department of Trade and Industry 7 Director Asteria Caberte nga hatagan og apil sa kantidad ang ubang dapit sa rehiyon sama sa Bohol diin ang mga trabahante nagdawat og mas dagko pa nga sweldo kon itandi sa Cagayan de Oro ug Butuan.
Iyang gipahinumduman ang board nga human sa bagyong Yolanda, sila nitugot sa P13 nga umento sa sweldo sa mga dapit sa Kabisay-an nga naigo sa kalamidad.
Ang ALU-TUCP niduso og petition nga naghangyo og P161 nga pag-adjust sa sweldo sa mga mamumuo sa Central Visayas samtang, P140 nga umento ang giduso sa Alliance of Progressive Labor.