HANGTOD karon wa pa diay gihapon mawala sa Alaska Aces kining ilang attitude nga mokalit lang og kapamugnaw ilabi na og mo-rally ang ilang kontra.
Kon unsay nahitabo sa niaging tuig diin dumadaog na unta sila ug daw anaa na sa ilang mga kamot ang kampyonato sa All-Filipino Conference batok sa San Miguel sa Game Four sa ilang finals series apan sa kalit nahanaw ang tanan, wa kini kalahian sa nahitabo sa ilang duwa niadtong Dominggo.
Kontrolado ug gani nakaposte na kini og 17 puntos nga labaw batok sa Ginebra San Miguel sa ilang quarterfinals round sa nagpadayon nga conference, apan sa third quarter gipabuthan sila og 21-0 nga rally nga nagpapas sa ilang bintaha ug wa na gyud kini maka-recover pa.
Hasta si coach Alex Compton nakapanglingo-lingo sa nahitabo ilabi na kay wala makabalik og duwa ang beteranong si Joe Devance sa Ginebra nga naghatag unta nila og gamayng bintaha.
Apan wa kini mapahimusli sa Aces ug hangtod sa katapusang buzzer wa molurang ang Ginebra sa ilang paghupot sa momentum sa duwa, 95-91, nga nakapabuhi sa dugo sa crowd-favorite alang sa sunod round.
Hinuon kay anaa man sa Alaska ang twice-to-beat nga bintaha, magsangka sila og balik ug ning higayona, usa nila ang mataktak samtang ang modaog maoy moabante sa semifinals round.
Labing siguro adunay adjustment nga himuon ang Alaska sa ilang mga plays pero kon dili gani hingpit nga mausab ang ilang attitude sulod sa korte, nga kon perming maglabaw unya og maapsan magkatibuagsa, dili ta makapaabot nga momaayo og dagan ang ilang kampanya.
Ang beteranong si Vic Manuel, usa sa mga sinaligan sa Aces, miangkon nga gigil sila sa maong duwa hinungdan nga dili kaayo sila maka-execute sa ilang play.
Sukwahi kini sa atong naobserbahan kay sagad sa mga beterano makamao nang modala sa pressure kon imong itandi sa mga batan-on.
Wa pa man tuod siyay titulo isip headcoach, apan hinuon sa kalidad ni Compton nga modala sa team, makapaabot ta og positibong resulta. Mao bitaw nga permi ni silang moabot sa finals.
******
Sa NBA, dili lang diay si Carmelo Anthony ang sakop sa New York Knicks nga morag way kasiguroan nga magpabilin sa team.
Hasta sab si Derrick Rose kinsa aduna pay usa ka tuig nga nahabilin sa iyang kontrata sa New York.
Hangtod karon wa pa siya makadawat og tanyag nga mahatagan siya og extension sa iyang kontrata ug dili halayo ang posibilidad nga malakip siya sa ipang-trade nga motapos karong Pebrero 23.
Samtang sa laing bahin, nasigpatan nga nagsiningkahay diay ni sila si Kevin Durant ug Draymond Green atol sa ilang duwa niadtong Dominggo diin napildi sila sa Sacramento Kings pinaagi sa overtime.
Kining mga panagbikil sa mga kauban ilabi na sulod sa korte natural ra kaayo ni sa usa ka team kay matod pa kabahin kini sa ilang diskusyon og pagpadayag sa ilang sentimento.
Apan morag lahi ang reaksiyon niadtong higayona, kay kini si Durant bugnaw nig ulo unya dili kaayo ni tig lalis sa iyang kauban.
Pero niadtong higayona grabi nga nakigsinghagay kini ngadto ni Green nga gani iya pang balik-ballkan bisan ug naglingkod na. Iyangmga kauban ang mitabang pag-uwang ug pagpabugnaw kaniya.
Mao kadtong higayona nga na ejected ilang coach nga si Steve Kerr ug na napahamtangan og technical foul si Durant. Di kaha ni makaapekto sa ilang kampanya? We’ll see what’s next. (junmigs0622@yahoo.com)