NAANGKON ni John Lester Belano ang titulo sa 2017 Little Wesley So Chess Cup sa Knight Attack Chess Cafe sa miaging adlaw sa 3rd Level sa Robinsons Galleria-Cebu.
Human sa torneyo, nagtabla sila si Belano, Jave Peteros ug Arje Villarin sa ibabaw nga luna nga parehong naggunit og 5.5 puntos.
Pinaagi sa tie-break, nakuha ni Belano ang kampiyunato, midakin-as sa ikaduha si Peteros samtang natagak sa ikatulo ni Villarin.
Si Belano nakabulsa og P1,000 nga ganti, nakakuha og P700 si Peteros samtang nakabaton og P500 si Villarin.
Ang torneyo gipasiugdahan sa Cebu Executives and Professionals Chess Association (CEPCA) alang sa ilang tinguha nga mas mapalambo pa ang duwang chess ug makadiskubre’g potensyal nga mga magduduwa.