NANGAYO og tambag si Olympian marathoner Mary Joy Tabal sa iyang nahimong mga coach sa Japan alang sa iyang umaabot nga training sa gawas sa nasod.
Si Tabal hugtanong nag-training sa Japan kaniadto alang sa iyang kampanya sa 2016 Rio Olympics.
Ang kanhi Olympian nga nahimong marathon coach nga si Akio Usami ug Sachio Hobara mitambag kang Tabal nga mag-training sa Italy ug Kenya ning higayuna.
Gipasabot ni Tabal nga gisugyot nila ni Usami ug Hobara nga magsugod siya sa Italy gumikan kay mas scientific ang training una mobalhin sa Kenya.
Sama sa naandan, moabaga sa gastuhan ni Tabal sa iyang training sa gawas sa nasod mao ang Motor Ace Philippines.
Tipik kini sa pagpangandam ni Tabal alang sa 2020 Tokyo Olympics ug 2017 Southeast Asian (Sea) Games.
Gipasabot ni Tabal nga sa dili pa siya mohimo og pinal nga desisyon, makighugpong una siya sa iyang dugay nang coach sa Sugbo nga si John Philip Duenas ug Motor Ace Philippines president Jonel Borromeo.
Si Borromeo kasamtangang naa pa sa gawas sa nasod.
Sa laing bahin, si Tabal padayon pang nakignegusasyon sa Philippine Amateur Track and Field Association (Patafa) alang sa iyang pagpasakop og balik sa national team.