EMUSYONAL ang manugretirong si Paul Pierce sa iyang katapusang pagduwa sa Garden sa kapildihan sa Los Angeles Clippers batok sa host Boston Celtics, 102-107, kagahapon sa National Basketball Association (NBA).

Si Pierce, 10-time All-Star, nagduwa kaniadto sa Celtics sulod sa 15 ka mga tuig diin nahimo siyang NBA Finals MVP niadtong 2008 dihang naagak niya ang Cetlics sa titulo.

Ang 39 anyos nga magduduwa mihalok sa sawog sa tungatungang bahin sa Boston Garden sa dayong pagsugod sa duwa diin sa usa ka talagsaong higayon, nahimo siyang starter sa Clippers.

Si Pierce mipahid sa iyang mga luha dihang gihatagan siya og standing ovation atol sa video highlight display diin naninggit ang mga tumatan-aw og “We Want Paul” ug “Thank You Paul” sa 2nd half.

Ang singgit sa mga tumatan-aw nahatagan og katumanan dihang gipasulod ni Clippers coach Doc Rivers, kanhi sab coach sa Celtics, sa nahabiling 20 segundos unya nakapasulod si Pierce og three-pointer nga maoy katapusang puntos sa duwa.

“I’m thankful he gave me that opportunity and that I got out here and made a bucket,” matod ni Pierce. “Truly great to play for the best fans in the world for 15 years and they showed it tonight. They just showered me with love.”

Dihang nagduwa pa siya sa Celtics, si Pierce nag-average og 20.0 puntos, 5.7 rebounds, 3.6 assists ug 1.3 steals, ikaduha sa all-time scoring sa kasaysayan sa team.

Sa iyang 18 ka mga tuig sa NBA, nakaduwa sab si Pierce sa Brooklyn Nets ug Washington Wizards apan wala’y makatubong sa gugma nga iyang nadawat gikan sa mga sumosunod sa Celtics.

Thunder 105, Trail Blazers 99

GIMUGNA ni Russell Westbrook sa 4th quarter ang 19 sa iyang 42 puntos aron agakon ang host Oklahoma City Thunder ngadto sa kadaugan batok sa Portland Trail Blazers.

Si Victor Olapido nidugang og 24 puntos ug 13 rebounds alang sa Thunder.

Ang Trail Blazers gipangulohan ni Damian Lillard pinaagi sa iyang 29 puntos samtang nitunol og 19 puntos si C.J. McCollum.

Raptors 103, Nets 95

BISAN aduna siya’y gipamati sa lawas, si Kyle Lowry nakamugna gihapon og triple-double aron tabangan ang Toronto Raptors sa pagbuntog sa host New Jersey Nets.

Si Lowry nagpakatap og 15 puntos, 11 re­bounds ug 11 assists.

Nakuha sa Raptors ang kadaugan bisan wala ang usa sa ilang labing sinaligan nga si DeMar DeRozan. AP/ESL