GIPANITAN sa Misamis Oriental General Comprehensive High School (Mogchs) ang Carmen National High School, 70-16, atol sa First Cagayan de Oro Public Schools Basketball Challenge 2017 ladies division niadtong Dominggo, Pebrero 5, didto sa West City Central School covered court.

Nangusog si Honey Janubas agi sa iyang 21 puntos alang sa Mogchs lady Cavaliers.

Gipakita sa lady Cavs nga pabiling hulga gihapon sila alang sa ilang hingpit nga karibal nga ang Indahag National High School Lady Skyhawks, diin nidaug sila sa Carmen National High School agi sa 98-9 nga tambak niadtong Sabado.

Niadto pa ang ilang panag-ribal sa unang edisyon sa Oro Speed Inter-Public School Basketball League.

Sa uban nga resulta sa boys, nibira si Christi June Dumangcas og 24 puntos aron sakwaton ang Tablon National High School agi sa 52-47 nga daug batok sa Iponan National High School.

Si Selwin Dave Ebonia ang niikor og taas sa Iponan nga adunay 16 puntos.

Gipildi sa Bulua National High School ang Kauswagan National High School, 63-44.

Nibangon sab ang Carmen National High School boys sa ilang kapildihan sa unang dula human giparot nila ang East Gusa National High School, 58-41.