GITAWAG ni Presidente Rodrigo Duterte og mga terorista ang mga sakop sa New People’s Army (NPA) atol sa iyang pagbisita sa Camp Evangelista, Barangay Patag, dakbayan sa Cagayan de Oro niadtong Dominggo, Pebrero 5.
Kini tungod sa niluog nga pagpatay sa tulo ka mga sundalo nga sila Sergeant Owen Yee, Corporal Niño Christopher Longcob Talabor ug Corporal Pat Olango kinsa sakop sa 8th Infantry Battalion sa 4th Infantry Division Philippine Army (4ID-PA).
Basi sa report sa Scene of the Crime Operatives, dili mominos sa 24 ka mga samad pinusilan ang naangkon sa mga sundalo sa matag-usa kanila.
Matud ni Duterte nga rason nganong iyang gitawag nga terorista ang mga rebelde tungod kay wala kini mga baruganan.
“The reason I categorized also the entire organization because of what they did. They announce publicly that they were lifting the ceasefire order February 10 but they were killing my soldiers and policemen in the meantime... ano ba?! Saan ba ang honor mo diyan?” suk-anon nga pamahayag niini.
Hinuon gibutyag ni Duterte nga taliwala niini ug sa iyang mando nga paggukod sa mga responsable, nagpabilin ang iyang panglantaw nga makab-ot gayud ang kalinaw.
Miapela sab si Duterte ngadto sa mga rebeldeng pundok nga monaog gikan sa bukid ug mobalik sa sabakan sa gobyerno tungod kay iyang ihatag ang unsa man nga benipisyo nga ilang madawat.
Gawas niini gimando sab ni Duterte nga kadtong mga political prisoner nga nag-peacetalk sa laing nasod ang ipapauli na ug ibalik sa prisuhan human wala na ang hisgotanang pangkalinaw.
Pasalig
Samtang gipasalig ni Duterte nga tabangan ang pamilya sa tulo ka mga namatay nga mga sundalo.
Lakip sa tabang nga gitanyag niini mao ang scholarship ngadto sa mga nahibiling anak sa mga sundalo nga mitungha ug trabaho ngadto sa ilang mga kapikas.
Gipasalig usab ni Duterte nga mahatagan ug hustisya ang niluog nga kamatayon sa tulo ka mga biktima.
Ang patay'ng lawas sa tulo ka mga sundalo temporaryong gihaya sa mortuary sa kampo sa 4ID-PA sulod sa kampo.
Gihatagan usab sila og pasidungog ni Duterte tungod sa ilang pagbuhis sa kaugalingon alang sa nasod.
Mga alas 4 sa hapon niadtong Dominggo nahidangat sa kampo ang presidente sa nasod.