Editoryal: Wa mapawong ang paglaum

SAMA sa giyab-an og tubig ang nagdilaab na untang tinguha nga maangkon ang tinuod nga kalinaw human nga nagkauyon ang kagamhanan ug Communist Party of the Philippines (CPP), National Democratic Front (NDF), ug New People's Army (NPA) nga maglingkod ug magsabot.

Gani pulos nagkauyon ang kagamhanan ug mga komunista nga modeklara og unilateral ceasefire alang sa tunhay nga panagsabot sa kalinaw.

Apan takulahaw lang nga kalit sab nga gipangbakwi sa matag habig ang maong deklarasyon ning uwahing mga adlaw gumikan sa nagkadaiyang mga hinungdan.

Ug niadtong Biyernes, gipahunong na mismo ni Presidente Rodrigo Duterte ang hinabing pangkalinaw tali sa mga komunista.

Duna pa kahay kahigayonan nga maangkon ang tiunay nga kalinaw sa nasud?

Ang pagbakwi sa unilateral ceasefire ug paghunong sa negosasyon nagkahulogan nga magsugod na sab kita sa naandan nga kahimtang - giyera batok sa militar ug mga rebelde.

Gani nanganti na ang militar nga proteksiyonan ug bantayan ang katawhan batok sa mga pagpanghasi sa mga rebelde, ilabi na didto sa kabukiran.

Way nada ang giyera gumikan kay ang nagpatay mga kadugo lang nga mga Pinoy.

Samtang mga mapagan, mga Pinoy lang usab, ilabi na gyud sa mga kabataan ug katigulangan.

Suspendido man ang hinabing pangkalinaw tali sa mga rebelde, apan wala dinhi mapawong ang paglaum nga maangkon gihapon ang kalinaw.

Si Presidential Adviser on the Peace Process Jesus Dureza mismo wala mawad-i og paglaum.

Samtang abli sab ang mga lideres sa walhong grupo nga ipadayon ang peace talks tali sa gobyerno.

Tingali sakto si Sec. Dureza nga nagkanayon nga di sayon ang dalan sa pagkab-ot sa kalinaw, apan ang bililhon niini nga wala kita motipas og direksiyon padulong didto.

Hinaut unta nga di kini maoy katapusan sa tanan natong mga tinguha sa pag-angkon sa tiunay nga kalinaw.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph