STA. CRUZ, Davao del Sur -- Hinay-hinay nang naulian sa maayong kahimtang ang usa ka samarong agila human naluwas kilid sa Sibulan River dihang naagian sa usa ka trabahante sa Hydroelectric Corp. (Hedcor) niadtong miaging semana.
Nasayran gikan sa mag-uumang sakop sa tribung Bagobo-Tagabawa nga si Henry Andi nga adunay bagang tapok sa mga langgam ang niatake sa agila, hinungdan nga dali siyang nanawag sa iyang mga kaubanan aron maluwas kini.
Daling naluwas ang langgam ug gitunol dayon kini sa Hedcor ngadto sa Philippine Eagle Foundation (PEF) nga padayong nag-atiman kaniya.
Subay sa datos, kini na ang ikaduhang agila nga naluwas sa Hedcor human kang Mabikkerr, usa ka Pinker's Hawk-eagle niadtong 2015.
Segun sa PEF, ang uwahing naluwas mao ang usa ka hingkod nga Philippine Hawk-eagle, nga anaa na sa kategorya sa mga "endagered species" mao nga angayang ampingan.
Nasayran gikan kang PEF biologist Giovanne Tampos nga luya na kaayo ang agila human na-dehydrate ug tungod sa pag-atake sa grupo sa mga langgam, naluya na ang walang pako niini.
Daling gitambalan ang agila ug gihatagan og pagkaon ug bitamina samtang gina-obserbahan ang kahimtang niini.
Nasayran gikan kang Tampos nga gikan sa timbang nga 750 gramos, anaa na kini karon sa 950 gramos human gitambalan.
Naglaum ang PEF nga mahibalik sa normal nga timbang ang agila ngadto sa 1,500 gramos.
Bisan ang Hedcor naglaum nga mahisama kang Mabikker ang agila diin human ang 37 ka adlaw hingpit nang naulian ang iyang panglawas. (Orlando B. Dinoy)