USA ka adlaw gikan sa pagbawi ni Pangulong Rodrigo Duterte sa peace talks batok sa New People's Army (NPA), malampusong nasikop sa Criminal Investigation and Detection Group (CIDG)-Davao ang usa sa mga consultants sa National Democratic Front of the Philippines (NDFP).
Alas 9:00 sa Lunes sa buntag nasikop mao si Ariel Arbitrario, alyas Ka Marlon, consultant sa NDFP ug secretary sa Guerilla Front 2 sa Southern Mindanao Regional Command (SMRC).
Si Arbitrario nasikop sa Task Force Davao Checkpoint sa Barangay Sirawan, Toril District, siyudad sa Davao.
Sakay si Arbitrario sa usa ka Colorado LT nga sakyanan, dunay plaka numero ADP-5617, nga gimaneho ni Rosario Sinday, diin sakay sab ang liaison officer nga si Roderick Manuyac, alyas Caloy.
Nasayran nga gikan sila Arbitrario sa usa ka barangay sa Toril District ug miagi sa TFD checkpoint aron mobalik sa downtown area.
Si Arbitrario gikustodiya na kagahapon sa CIDG-Davao.
Dugang nasayran nga nasikop si Arbitrario sa CIDG Pebrero 17, 2016 tungod sa kasong murder nga dunay criminal case number 20502 sa sala ni Judge Virginia Tehano-Ang sa Regional Trial Court (RTC) 11, Branch 1.
Si Arbitrario naka-piyansa bulan sa Agosto ug milarga sa Norway alang sa peace talks tali Communist Party of the Philippines (CPP)-NPA-NDFP ug gobyerno sa Pilipinas.
Si Anakpawis Representative Ariel Casilao, kinsa miyembro usab sa peace reconciliation committee sa Kongreso, nagbutyag nga usa ka basihan nga dili angay dakpon si Arbitrario ang piyansa nga gitugot sa korte samtang padayon pang gidungog ang iyang kaso.
Gipasabot sab niya nga mahimo lang silang dakpon kung giwad-an og bili sa korte ang ilang piyansa.
Niining mga semanaha, si Duterte nagsulti nga tungod sa gihimo sa mga NPA, makonsidera na niyang terorista ang komunistang grupo.
Gimando sab niya sa militar ug Bureau of Immigration (BI) nga panid-an ang NDFP consultants kung mobalik sa nasud.
Apan ang NDFP nag-ingon nga di angay nga ipadakop ni Duterte ang mga consultants gumikan nahisakop pa sila sa Joint Agreement on Safety and Immunity Guarantees (Jasig).
"Of course, yung protection nila covers under a continuing negotiations," sulti ni Casilao.
Ang pamunoan sa CIDG-Davao wa pay giluwatan nga pahayag kagahapon labot niini.
Gilayong nagpahigayon og press conference si Bayan Muna Representative Carlos Zarate kagahapon didto sa Manila labot sa pagdakop kang Arbitrario.
"The members of the government panel were already made aware of this. I hope this will be resolved soon so it will not complicate matters," sulti ni Zarate.
Pebrero 1 ning tuiga giwagtang sa NPA ang unilateral ceasefire dayon nahitabo ang pagpangatake sa mga rebelde sa Manay, Davao Oriental nga gikamatay ni Second Lieutenant Victor Alejo ug laing tulo pa ka sundalo sa Bukidnon.
Sa pagbisita ni Duterte sa haya sa sundalo sa Cagayan de Oro City, namulong ang Presidente nga iyang gipahunong ang peace talks ug dakpon ang mga consultants kung mobalik sa nasud.
"Peace talks will remain cancelled unless there is a compelling reason that will benefit the interest of the nation," pahayag ni Duterte.