DAW naghuramentado ang China sa pagpanalipod nila sa ilang gihimong reclamation sa South China Sea nga atong gitawag og West Philippine Sea.

Bisan giunsa silag pakgang ni US Defense Secretary Ashton Carter ug Pres. Barack Obama, nagpalingog-lingog lamang ang China.

Ang tanang gagmay’ng isla ug reef sa South China Sea giangkon sa Beijing. Giangkon usab ug gitukoran kini og mga outpost sa Pilipinas (8), Vietnam (48), Malaysia (5) ug Taiwan (1).

Gitaral sa Pilipinas ang China ngadto sa Permanent Court of Arbitration (PCA) sa The Hague, apan ang Beijing wala manumbaling niini. Kon ugaling mohukom ang PCA pabor sa Pilipinas motuman ba ang China niini? Makahimo ba ang Pilipinas sa pagpatuman sa maong desisyon?

Si Daniel Wagner, author sa librong “Managing Country Risk” nagtuo nga ang Pilipinas kinahanglang magpatabang sa ubang mga nasod aron pagpugos sa China. Ang United Nations Security Council dili mag-apil-apil sa maong kaso kay sakop nila ang China og duna usab kini veto power.

Sa iyang pangagpas nga nakapabor ang Pilipinas sa maong kaso apan ang problema kon motuo ba niini ang China. Kon dili na sila motuman sa korte kinsa may tuhoan ug kahadlokan sa China?

Presidentiables

Si kinsa may modagan sa pagka-presidente sa nasud? Ang popular nga presidentiable nga si Sen. Grace Poe giingong disqualified tungod kay kuwang og unom ka buwan ang iyang pagpuyo sa Pilipinas. Di pa hinuon kini final.

Si Bise Pres. Jejomar Binay gikulata na pag-ayo sa mga senador nga iyang kaatbang. Gi-freeze sa Anti-Money Laundering Council (AMLC) ang iyang mga kwarta sa banko maong gikahadlokang wala na siyay salapi nga magamit sa eleksiyon. Si DILG Sec. Mar Roxas kanunay nga namunbon sa survey.

Si Davao City Mayor Rodrigo Duterte miklaro na sa iyang tinguha nga magpapili pagka-presidente. Buot niyang ikapares si Gob. Vilma Santos.

Ang klaro na lang nga mokandidato mao sila si Binay, Roxas ug Duterte. Nagpahipi pa hinuon si Sen. Bongbong Marcos ug si kanhi senador Ping Lacson.

Cebu politics

Wa ko mahibung nga modagan si kanhi kongresista Tomas Osmeña batok kang Mayor Mike Rama. Ambut og nganong gipaigot paman ni Tomas ang maong announcement.

Ang iyang katarungan mao nga wa man kunoy mga proyekto ang Cebu City ubos sa Rama administration. Apan mosumbalik kini kaniya kay gipasanginlan man sa Team Rama ang Bando Osmeña-Pundok Kauswagan nga maoy kanunay nga mobaraw sa mga proyekto unta ni Rama.

Sa Talisay City, gipaabot nga mag-atbang sila si Mayor Johnny delos Reyes ug si kanhi kongresista Eddie Gullas. Ambut og modagan ba si Bise Mayor Romeo Villarante pagka-mayor. Tingali’g mag-uban sila si Konsehal Caballero sa laing partido.

(msr1144@yahoo.com)