MAGHARONG sa ikaduhang higayon sila si Cebu City Mike Rama ug kanhi mayor ug kongresista sa habagatang distrito sa syudad sa Sugbo Tomas Osmeña sa eleksyon sa pagkamayor sa syudad karong 2016.

Sa eleksyon sa 2013, si Osmeña, founder sa Bando Osmeña Pundok Kauswagan (BOPK), gipildi ni Rama nga nakakuhag 217,448 ka botos batok sa kang Osmeña nga 211,072 botos.

Kon boksing pa ni, mao ni ang rematch tali ni Rama ug Osmeña. Kinsa kahay molahutay hangtod sa katapusang hugna? Ang mga botante maoy referee. Kinsa may padag-on sa mga referee?

***

Namahayag si Mayor Mike Rama nga daan na niyang gipaabot nga makig-rematch kaniya si Osmeña, ang  kanhi niya political mentor sukad siya nahimong konsehal sa syudad duha ka dekada na ang milabay.

“Dugay ra ko gahuwat ana. I know that any person will always be a worthy opponent. Ambot unsa g’yud ang iyang tumong nga mobalik sa pagka-mayor, but I will not stop his desire from running against me,” Rama matod pa ni Rama.

Nganong gustong mobalik si Osmeña sa pagkamayor? Matod pa ni Rama, “Mao man g’yud na, dili man na malikayan nimo kay naa may giingon nga unfinished business tingali.” Ug kamo na lang ang mag-igo kon unsa kana nga business nga balikan man gyud.

***

Pero si Osmeña niingon nga gusto siyang mobalik pagkamayor kay ang administrasyon ni Rama wa makapatuman sa mga proyekto nga makabenipisyo sa katawhan sa syudad sa Sugbo.

Wa pa tingali makadawat si Osmeña sa pagbabag ni Rama sa iyang mga proyekto nga mobalor og P300 milyunes dinhi sa syudad.

Sa iyang pagpangluod, iyang gibalhin ang pundo ngadto sa road-widening project ni kanhi Kongresista Eduardo Gullas sa primero distrito sa lalawigan sa Sugbo. Imbis ang taga syudad sa Sugbo maoy makabenipisyo, ang taga primero distrito na hinuon ang nagkapahimulos niini.

***

Ang matag politiko managlahi og panglantaw alang sa katawhan nga ilang gialagaran mao na nga di gyud mahuman ang ilang tinguha nga moalagad. Lain-lain silag mga proyekto nga gusto. Dunay gustog reclamation, dunay gustog highway.  Sama ni kanhi Cebu Gov. Lito Osmeña nga nideklarar nga moadagan pagbalik isip gobernador sa Sugbo kay wa pa matuman ang iyang damgo, ning higayona, ang usa ka trans-axial highway nga maglatas sa taliwa sa Sugbo gikan sa amihanan ngadto sa habagatan.

Si Mayor Mike Rama dunay say gusto nga proyekto apan babagan man sab sa konseho. Maayo tong panahon ni Osmeña, way labad sa ulo kay iya ang konseho.