INGON pa ni Spiderman, “with great power, comes great responsibility”. Ang dakong gahom giubanan og dakong responsibilidad, maoy ingon niya.

Mao nga ang katilingban maghangad kanunay sa mga tawo nga dunay gahom, nagpaabot nga taas kini og standard sa bisan unsa nga aspeto sa pagpuyo ug kinabuhi kay sa yanong mga linalang.

Lakip sa gitamod sa katawhan ang mga magsisibya kun brodkaster nga ilang madungog sa mga sib­yaanan sa radio ug telebisyon.

Mao nang dali nga gipistahan ang gibuhat sa radio blocktimer nga si Roger Cimafranca ngadto sa usa ka traffic enforcer nga nidakop kaniya sa may South Road Properties (SRP) niadtong Mayo 20.

Gipistahan di tungod kay siya sikat kun inila, kon di tungod sa iyang pagkamagsisibya.

Sa gi-upload nga record sa hitabo sa cell phone sa enforcer, nangasaba, nanghulga ug nipaila si Cimafranca nga brodkaster, angay kahadlukan. Iyang pakulban sa kaldero ang enforcer.

Gikinahanglan ba diay nga ibandilyo nga ikaw usa ka mediaman kon ikaw nadakpan sa usa ka kalapasan sa balaud sa trapiko? Di ba diay siya mahimong madakop kay siya magsisibya?

Ang sala sa usa ka nagpailang “mediaman” nagduhig og lapok sa mga journalist nga bisan gani ang pagkwentas o pagpakita sa identification (ID) card ngadto sa publiko kasagaran gilikayan.

Sa gihimo ni Cimafranca, iyang giyaga-yagaan ang propesyon sa mga journalist, labina sa mga magsisibya.

Isip magsisibya, bisan kon siya usa ka radio blocktimer, gikinahanglan siyang mosubay sa ethics sa pagpanibya. Angay niyang timan-an nga ang respeto makuha kon siya nakahibawo nga uban sa gahom naa ang dakong responsibilidad.