DUL-AN sa 40 ka mga drayber sa mini-bus nga magbiyahian sa habagatang bahin sa lalawigan sa Sugbo ang nisalmot sa Defensive Driving Training nga gipasiugdahan sa Apo Cement Corp. Philippines (Cemex) niadtong Mayo 27 sa ilang buhatan sa Barangay Tinaan, dakbayan sa Naga, Sugbo.

Ang maong kalihokan gituyo alang sa pagpakabana sa Cemex Cares ug sa Land Transportation Office (LTO) 7 atol sa kasaulogan sa National Road Safety Month.

Matod ni Arnold M. Alonzo, transport safety superintendent sa Apo Cement Corp., ang maong pag­bansay-bansay gituyo aron madugangan ang pagmatngon sa mga driver sa ilang pagmaneho ug kalikayan ang mga disgrasya sa kadalanan.

Gitambagan ni Alonzo ang mga driver nga dili magpakusog pagpadagan ug dili magdali sa ilang biyahe ug dili isakripisyo ang kaluwasan sa ilang kaugalingon ug sa ilang mga pasehero bugti sa dako nga kinitaan.

“Mag-unsa man ang dakong kinitaan apan simbako lang madisgrasya?” matod ni Alonzo. Giawhag usab ni Alonzo ang mga driver sa paggamit kanunay sa ilang seatbelts.

Matod sa mga driver nga sagad sa hinungdan nga dli magamit ang seatbelts tungod kay wa sila maanad, kay kini hugaw ug sagabal.

Niingon si Alonzo nga ang mga drayber adunay kapili-an, apan iyang gitino nga mas siguradong luwas ang pagmaneho kon ang driver mag-anad sa pagtaod sa iyang seatbelt.

Ang kalihukan gitambongan usab ni Joel Maloloy-on, LTO 7 Operations chief, kinsa mihatag usab og mga pagtulun-an mahitungod sa luwas nga pagmaneho og sa hustong pamaagi sa paglukat og lisensya sa pagmaneho; Julie Flores, pangulo sa Cebu South Mini Bus Operators Association og Engr. Gery Rota, Apo City of Naga plant manager, Engr. Ariel Lazarte, Apo EHS engineer ug ni Marlito Gabison Cabigas, Apo Community relations officer. (PR)