LISOD masabtan ang katuyoan sa Simbahang Katoliko sa gibasa nga Pastoral Letter kaniadtong miaging Dominggo. Mao kini hinungdan nga nagkalainlain lang ang interpretasyon sa mga kaparian nga mibasa niini. Nagdugang lang kini sa kalibog sa mga Katoliko.

* * *

Kon wa sila mouyon sa gihimo sa Presidente batok sa problema sa drugas, unsa man ang ilang solusyon nga angayan sundon sa Presidente? Aduna bay gihatag nga alternatibong solusyon ang Simbahang Katoliko? Kon duna man gani, angayan nga ang Simbahang Katoliko ang mag-una sa paghimo niini aron pagsuta kon epektebo ba kini sa pagsumpo sa nagkagrabe nga problema sa druga.

* * *

Kaduha na mahitabo nga wa tahora sa mga tawo ang Simbahang Katoliko. Sa panahon ni kanhi Presidente Noynoy Aquino, didto molaban ang Simbahang Katoliko ni Gibo Teodoro og ila nga gikontra ang kandidatura ni Aquino. Nasuko ang Simbahang Katoliko ni Aquino tungod sa pagsuporta niini sa Reproductive Health Bill nga karon balaod na. Human sa ihap, napildi si Gibo og naglawodlawod ang kadaugan ni Noynoy Aquino. Midaog si Noynoy Aquino bisan pa sa ghimo sa Simbahang Katoliko batok kaniya.

* * *

Sa dihang mikampanya sa kanhi Davao City Mayor ug karon Presidente Digong Duterte, ang Simbahang Katoliko didto mopalayo sa kandidatura ni Grace Poe. Gani, ila pa nga gikampanya si Poe ug giatake si Duterte kay imoral. Apan midaog gihapon si Duterte sa makabungog nga kadaugan.

* * *

Unsa may ipasabot niini? Nagpasabot lang kini nga bisan naminaw ang mga katawhan sa gibasa nga Pastoral Letter, wa kini nila sunda ug naghimo sila og kaugalingon nila nga desisyon. Ug tungod kay kaduha na man kini mahitabo, klaro kaayo ang buot ipasabot niini. Di na epektibo ang Pastoral Letter. Nakadungog apan wa maminaw ang mga Katoliko. Angayan nga tun-an usab kini sa CBCP og angayan pa ba sila nga magpagawas sa Pastoral Letter.

* * *

Daghang mga kaparian ang wa makauyon sa Pastoral Letter sa CBCP. Gawas sa ilang gisulti nga pabor sila sa kampanya nga gihimo ni Presidente Duterte batok sa drugas, wa nila hatagi og dakong gibug-aton ang Pastoral Letter. Gibasa man tuod nila kini apan wa na sila modugang pa og sulti. Gani, makita man nga gidali-dali lang nila kini og basa ug wala magsapayan og nasabtan ba kini sa mga nanimbahay. Ang uban sab, mibasa lang sa Pastoral Letter apan lain ang unod sa ilang homily.

* * *

Dako kaayo og kausaban ang kagamhanan ni Presidente Duterte. Tungod sa lainlaing mga katalagman nga mibiktima sa mga pobreng mag-uuma, adunay gihatag nga P1 ka bilyon si Duterte ngadto sa Department of Agriculture. Matod pa ni Agriculture Secretary Manny Pinol, gamiton ang pundo alang sa gitawag og SURE loan program. Sa mga mag-uuma nga nabiktima sa natural nga mga katalagman sama sa baha, linog, bagyo, rat ug locusts infestations ug susama pa nga mga hinungdan, mohatag ang DA sa kantidag nga P35,000 sa kada mag-uuma. Ang P10,000 ihatag isip grant. Pasabot, di na bayran sa mag-uuma ang kantidad. Ang P25,000 ihatag isip pahuwam pero way collateral ug way interest. Gamiton ang kantidad sa pagpalit sa binhi, abuno ug suholan sa motrabaho sa uma. Apan dunay kondisyon nga angay sundon. Kinahanglan nga certified seeds ang gamiton sa mag-uuma ug di ang karaan nga klase sa binhi. Gawas pa niini, kinahanglan nga ang LGU modeklarar og state of calamity unya i-verify kini sa NDRRRMC.

* * *

Kaniadtong miaging Biyernes, sobra sa 10 ka mag-uuma sa CARAGA region ang nakadawat sa kantidad nga P35,000 kada usa, sinaksihan mismo ni Presidente Duterte ug Secretary Pinol. Gawas niini, pipila ka mga grupo sa mga mag-uuma ang nakadawat og mga himan sa panguma sama sa traktura ug uban pa.

* * *

Atol sa kalihokan, gipakita usab ni Secretary Pinol kang Presidente Duterte ang Solar Powered Irrigation System (SPIS). Ang SPIS magamit pagbomba sa 1,000 ka gallon nga tubig alang sa irigasyon sa 150 ektarya nga basakan sa humayan. Ang paggamit sa SPIS sa tibuok nasod, matod pa ni Pinol, makadugang sa di momenos 2.9 metric tons nga abot nga humay. Buot ipasabot, sayon ra kaayo matubag sa gobiyerno ang kakuwang sa panginahanglan nga 1.8 metric tons nga humay sa tibuok nasod. Di na kinahanglan pa nga mag-import og bugas gikan sa ubang nasod kon gamiton na sa mga mag-uuma ang SPIS, dugang pa ni Pinol. Dako ang kalipay ni Presidente Duterte sa gipakitang kakugi ni Pinol pagtubag sa problema sa pagkaon.