GIPAILA sa nagkadako na nga Johndorf Ventures Corp. (JVC) ang bag-ong dakong proyektong giugmad niini nga mobukas sa 655 ka mga bag-ong puluy-anan alang sa mga pamilyang ekonomikanhon ug middle-class diha sa dakba­yan sa Carcar.

Bag-ong yuta

Una ang Tierra Nava, nga buot ipasabot “bag-ong yuta,” sa unom ka mga subdivision nga ilusad sa JVC karong tuiga dinhi sa Sugbo ug sa tulo ka mga dagkong dakbayan sa Mindanao.

Nalakip sa puhunang P500 milyones alang sa Sugbo atol sa ika-30 na ka tuig sa JVC, naglingkod ang Tierra Nava sa 5-ka-ektaryang luna sa talampas sa Dapdap, Poblacion III sa Carcar, 42 kilometros sa habagatang bahin gikan sa dakbayan sa Sugbo.

“Gidala ang pagkaba­tid nato sa dekalidad nga maabot nga pamuyo sa giilang Heritage City sa Sugbo, pinaka-una sa plano sa Johndorf nga mo­palapad sa laing mga teritoryo sa Sugbo karong tuiga,” nagkanayon si Michele Chiu - Bacungan, sales and marketing manager sa JVC.

Nahimutang sa kinasang-an sa habagatang Sugbo, ang mga nagagikan sa una, ikaduha ug ikapitong distrito sa probinsya dili na hinahanglang manimuyo sa dakong dakbayan ug makatabang pa nga mapaluag ang dakong sentro, siya misugilon.

Corridor

Lakip ang Carcar sa industrial corridor sa ha­bagatang Sugbo, katupad ra sa San Fernando ug duol sa dakbayan sa Naga diin naa ang nagkalainlaing dagkong industriya.

Usa ka nagtubong dakbayan, naabiabi na sa Carcar ang mga dagkong tindahan sama sa Super Metro ug Gaisano Price Club ug usab mga banko ug serbisyong pamatigayon nga maadtoan alang sa mga pangina­hanglanon sa panimalay ug kaugalingon.

Mamahimo sang ipa­dala sa mga mamuyo unya sa Tierra Nava ang ilang mga anak sa duol nga mga tunghaan nga Mother Mary’s Children School, Carcar Academy ug St. Cathe­rine’s College, ug mao sab sa hitsas na nga mga publikong tulunghaan.

Barato

Bag-o lang nga gipaila sa kompanya ang bag-o niining proyekto sa mga real estate broker ug sa ilang mga ahente human niini nahuptan ang license to sell, numero 031048, gikan sa Housing and Land Use Regulatory Board (HLURB).

Makadani ang Tierra Nava alang sa mga nagsugod pa lang nga pamilya, mga propesyonal ug mga na­muo gawas sa nasud (OFW), matod ni Bacungan.

Kini tungod kay ang matag kapuy-an niini nag­­kantidad lang og P950,000 nga mamahi­mong mapa-ubos sa Home Mutual Development Fund (HDMF), kon Pag-IBIG, siya mipasabot.

Mapasaligon sab ang mga kaabag sa kompanya nga mga bangko nga padayong moabag sa mga proyekto niini pinaagi sa pagtanyag sa mga pumapalit og kapuy-an og ma­kab-ot ra ug makataronganon nga pa-utang, siya midugang.

Sa kasawgan nga 36- metro kwadrado (sqm) matag balay nga mobarug sa lunang 42-sqm, susama ang mga townhouse sa malampusong Johndorf Com­munities sa Calawi­san, dakbayan sa Lapu-Lapu, apan may pipila ka mga kalahian ra sab.

Matagamtam sa mga lumolupyo unya ang tatak-Johndorf nga mga kalingawan sama sa magamit gyud nga clubhouse, ensaktong basketbolan, ug mga hawanan alang sa duladula ug pagpanagtapok.

2 ka tuig

Nagkanayon si Bacungan nga tumong sa JVC nga matapos ang Ti­erra Nava sa tunga-tungang bahin sa tuig 2019.

Naugmad sa Johndorf human sa kapin 30 na ka tuig sa pagpanukod og mga dekalidad nga balay ug masako nga mga ko­­­munidad ang mga pamaagi nga makapadali ra sa pag-ugmad nga dili makompromiso ang kalig-on sa semento.

Makiglambigit sa usa ka accredited broker o’ mobisita sa opisina sa Johndorf sa ika-14 nga ang-ang sa Ayala Life - FGU Center tabok sa Ayala Center Cebu harun makisusi. (PR)