DI ni gaan nga sangon kondi bug-at nga yugo nga gisal-ob sa liog sa PDEA (Philippine Drug Enforcement Agency) kining dakong gubat batok sa drugas. Kay gitangtang na gikan sa PNP.

Pagbuot ni Presidente Duterte nga hukasan ang PNP sa dakong katungdanan batok drugas tungod sa giingong ‘Tokhang for Ransom’ pagpangidnap ug pagpatay nga gihimo sa mga dautan nga mga pulis sa kaulohan.

Limpiyuhan una sa ta­nang hugaw ang kapulisan apil na ang mga ilo nga wa hipusa nga nangakatag-katag sa ilang buhatan sa tibuok nasod. Life-style check! Kini kuno ang daling hinagiban sa paglimpiyo. Daghang mga pulis nangadato. Pila ra goy suweldo nila.

Unsay maayo nga kining mga dautang pulis maoy ig-on sa tokhang gikan sa mga sibilyan nga militia (maayong tukuron) aron dali ang paglimpyo. Apan matod pa sa akong higala kuyaw kay maoy pabilo sa kagubot.

Ang dakong pangutana mao makada ba ning yugo nga bug-at ang PDEA? Giangkon na sa PDEA nga kuwang silag tawo. Apan miingon ang armadong kasundaluhan nga andam sila pagtabang sa PDEA.

Maayong konsepto ang panaglambigit sa duha ka puwersa apan lisod ang pagtuman sa tambayayong nga kalihukan kay lainlain man ang herarchical nga kahimtang sa duha.

Tingali, molampos kon i-detail gyud completely ang mga sundawo sa militar ngadto sa PDEA diin kini makamando na kanila. Sa ato pa, mga tawo na sa PDEA sila ug wa nay higot sa ilang mother units.

Nasayod ta nga ang PDEA ug PNP susama rag gitindugan kon kaligdong maoy hisgutan. Gani diha toy mga PDEA agents nga nasangkot sa mga anomaliya sa pakiglambigit sa mga drug lord.

Diha gani toy dako sa PDEA nga natimpasaw sa nagbukal nga tubig tungod sa mga anomaliya nga may kalabutan ang drugas. Apan sama sa kapulisan duna say mga buotan ug tarong nga mga sakop niini.

Di ikalimod nga ning gubat batok drugas, dako sad ang natampo sa PDEA. Gitaya sad nila ang ilang kinabuhi. Asa kaha sila kutob sa tinuoray nga pagpanggukod sa mga sindikato sa drugas?

Wa kahay matawo nga agid-agid sa ‘Tokhang for Ransom’? Anaa na sa ilang mga kamot karon ang kaugmaon sa gubat batok drugas taliwa sa kalipay sa mga drug lord. Kon modaog sa gubat ang PDEA ang koronahan.

Apan ang tinuod, husto si Duterte sa iyang desisyon pagpahunong sa kapulisan sa anti-drug operations kay nauyog sa kahugawan. Sa laing bahin libre na siya kay wa nay extra-judicial killings nga ibato niya kanunay nga maoy utok.