ISIP usa sa mga kalihukan sa umaabot nga Adlaw sa Pagminahalay, ang Kiosk 8-Ball Billiard Hall mopahigayon og Valentines Challenge Cup 10-ball handicapping tournament nga sugdan karong Pebrero 14 sa nahisgutang dapit sa Osmena Boulevard, dakbayan sa Sugbo.

Ang torneyo nga salmotan sa lokal nga mga tirador sa Sugbo ug sa silingang mga dapit mosunod sa naandan nga format diin himuon ang upat ka adlaw nga elimination round.

Kini ipahigayon sa Pebrero 14, 15, 16 ug 17 samtang ang Top 16 ug championship game duwaon sa petsa 18 ning buwana.

Ang top four sa matag elimination series maoy mo-qualify sa Top 16 alang sa knockout stage nga maoy modeterminar kon kinsa ang mag-abot sa finals.

Gawas sa ganting salapi aduna usay championship trophy ang makampyon sa torneyo.

Ang champion makabulsa og P15,000 ug P5,000 alang sa runner-up. Ang third ug fourth placers aduna usay madawat nga tag P3,000 ug P2,000. Samtang ang masulod sa Top 12 makasiguro na usab og tag P200.

Ang entry fee nagkantidad og P200 samtang P150 ang re entry. Ang mga tigpasiugda nga pinangulohan ni Allan “Colonnade” Milan naglaraw usab nga mohatag og mga gift packs pinaagi sa raffles alang sa mga partisipante.

Hugot nga miitsa sa ilang suporta sa lima ka adlaw nga kompetisyon mao sila si Cebu City councilor Jerry Guardo, kinsa maoy chairman sa committee on youth and sports sa konseho, ug ingon man si Barangay Captain Clyde Seblos sa Buanoy, lungsod sa Balamban.

Alang sa dugang detalyi mahimong mokontak o mo text lang ni Milan pinaagi sa iyang cellphone number 0939-358-5605. (PR)