GIPAMULTA sa National Basketball Association (NBA) og $25,000 si Golden State Warriors coach Steve Kerr gumikan sa iyang gipangbuhian nga mahait nga mga pulong batok sa referee ug dugay nga paggawas niini bisan na-ejected nga nakalangan sa duwa.

Niulbo ang kaspa ni Kerr sa kalagot ngadto kang referee Bill Spooner sa nahabiling 3:34 minutos sa overtime nga kapildihan sa Warriors batok sa Sacramento King, 106-109, niadtong Dominggo (RP time).

Si Kerr, 2016 Coach of the Year, na-ejected dihang nisulod kini sa korte paingon ngadto kang Spooner. Gipugngan si Kerr ni assistant coach Mike Brown. Niadtong mga gutloa, naggukod ang Warriors, 73-75.

Duha ka mga tawag ni Spooner ang nakapalagot kang Kerr.

“I was mad about a lot of things, but I got what I deserved,” asoy ni Kerr. “I deserved to be ejected, so I was, so I have no complaints.” AFP/ESL