ORMOC CITY, Leyte - Nailhan na ang duha ka lawas sa tawo nga napaig sud sa usa ka sakyanan nga gisunog didto sa Abuyog, Leyte sa miaging buwan.
Sa report gikan sa Police Regional Office (PRO) 8, ang duha giila nga sila si Bernardino ‘Bernie’ Remolador, 44, taga Matagnao, Abuyog, Leyte ug kapuyo nga si Jennifer Corsiga, 25, anak sa usa ka inmate sa Abuyog Penal Colony.
Ang duha ka biktima nagsakay sa usa ka Toyota Avanza nga gipanag-iya ni Fernando Remolador, manghud sa nauna.
Nakit-an sa usa ka pulis nga si PO1 Marco Alexis Mercado ang sunog nga sakyanan daplin sa highway sakop sa Barangay Balinsasayao sa lungsod.
Narekober ang duha ka patayng lawas sa mga biktima ug usa ka pistola.
Dugang sa report sa PRO8, gitumbok nga responsable sa insidente ang ubang nahabilin nga sakop sa Alvarez Drug Group ni anhing Edgardo ‘Egay’ Alvarez kinsa napatay sa Criminal Investigation and Detection Group (CIDG) 8 atol sa raid sa Abuyog Penal Colony sa miaging tuig.
Nasayran nga si Bernie usa ka sinaligan nga batos ug giingong usa sa nakabenipisyo sa kabtangan ni Egay.
Gikasuyaan sa ubang miyembro sa drug group ang biktima nga maoy posibleng rason sa pagpatay niini.