GIPASAKA na ni Cebu City Mayor Tomas Osmeña ang kaso nga Obstruction of Justice batok ni Presidential Assistant for the Visayas Michael Dino sa Office of the Ombudsman Visayas.

Kagahapon sa udto, gi­lagdaan sa mayor ang iyang gisang-at nga kaso diin ang City Legal Office personnel maoy moduso ngadto sa buhatan ni deputy Ombudsman Paul Elmer Clemente. Gipangayo ni Osmeña nga mapaubos si Dino sa preventive suspension sulod sa unom ka buwan sama sa gipahamtang ngadto kang Kapitan Felicisimo “Imok” Rupina ug pito ka mga konsehal.

Gibasehan sa mayor sa iyang gisang-at nga kaso mao ang giingong pagpanginlabot ni Dino sa kalihukan sa barangay diin siya gipasanginlan nga nitawag kang Rupinta bisan gisuspenso na sa Ombudsman aron mangayo og duha ka pangalan. Apan ang maong alegasyon gisalikway ni Dino ug Rupinta.