MIAWHAG si retired Supreme Court chief justice Hilario Davide Jr. sa nasudnong kagamhanan nga ipatuman sa hingpit ang 1987 Constitution inay usbon ang sistema sa panggobiyerno sa Pilipinas.

Si Davide niingon sukad naumol ang 1987 Constitution 30 ka tuig na ang nakalabay, 25 porsi­yento ngadto sa 30 porsi­yento pa lang sa mga provision niini ang napatuman.

“We have to give the Constitution a longer life, until the objectives, the aspirations, and the ideals of Filipino people embodied there shall be implemented and find out if something still missing or something is wrong or needed,” pahayag sa amahan ni Gobernador Hilario Davide III sa pakighinabi sa mga tigbalita diin usa siya sa mga bisita sa adlawng natawhan ni Cebu Archbishop Emeritus Ricardo Cardinal Vidal niadtong Lunes.

Si Davide, miyembro sa 1986 Constitutional Commission, nihulagway sa federal system nga anti-poor gumikan kay duha ka mga klase sa buhis ang bayran sa mga tawo kon kini masagop, usa alang sa estado ug laing usa sa federal government.

Siya nipadayag ang pag-usab sa kasamtangan nga klase sa panggobiyerno sa nasod magbahinbahin sa mga tawo.

Siya nipasabot ubos sa federal state, ang matag estado kinahanglan dunay kaugalingon nga Constitution, national assembly ug hudikatura.

Alang niya dili pa panahon nga amendahan ang Constitution.

“You know, before you ever think of adopting federal system, the one proposing it must fully realize how it works. We have not tried it yet,” dugang niini.

Ang retirado nga chief justice nihulagway sa 1987 Constitution nga maoy labing maayo sa tibuok kalibotan.