DEAR Dr. Fritz,
Maayong adlaw kanimo ug sa tanan nga tigpanubay ning imong lilas diri sa SuperBalita. Tawaga lamang ako og Lilac.
Sa akong panuigon karon, dok, nga 50 anyos, nagaregla pa gihapon ko, apan wala pa gihapon ko tawoy anak. Nangandoy ko uban sa akong bana og bata ug sa pipila ka higayon gayud namo nga gisulayan nga makabaton og anak.
Gani, nagpagalam kami. Apan walay nahitabo.
Sa tinud-anay lamang, dok, nisurender na gayud kami. Apan ning bag-ohay lamang, nabalitaan nako nga nanganak si Janet Jackson sa panuigon nga 50 anyos sa unang higayon. Kini ang daw nipukaw sa akong paglaum sa among gipangandoy sa akong bana.
Karon, dok, nisuwat ako kanimo aron matagaan og kahupay ang akong mga pangutana mahitungod niining akong sitwasiyon. Daghan ko og nadunggan nga hataas na akong risgo kung ako maburos niining pangedarona.
Apan unsa man gayud kini nga klase nga risgo, dok? Unsa man sad ang akong angay nga buhaton aron mapakgang kini nako?
Nakahibalo ko, dok, nga daw imposible ang akong gusto nga labangon. Apan seguro kung magiyahan mi nimo, mas maayo seguro ang mamahimong paglawig nga akong pagasuongon.
Daghang salamat ug magpaabot ko sa imong tubag. More power to you and God bless.
Lilac of Sta. Ana
*****
Dear Lilac of Sta. Ana,
Daghan gayud ang gusto nga mag-ala Janet Jackson ug usa ka na niini. Apan ang problema, dili ang tanan nga 50 na ang pangedaron, susama sa sitwasiyon ug kasuwerte ni Janet Jackson. Ambot lang kaha ug makakiskis ta sa kuko ni Janet, tingali og naa tay purohan... Hehe…
Apan sa tinuod lang, kining pagmabdos nga sobra sa 50 anyos karon, nahimo na nga mas posible tungod sa mga pag-abanse sa mga teknolohiya sa pagtabang sa reproductive system, ilabi na sa matang sa pag donar sa itlog.
Tipikal sa usa ka babaye nga moundang na kini siya nga makaanak sa panahon nga mag-menopause na, nga nagpasabot lamang nga kung ang usa ka babaye, nag-menopause na kon 12 na ka bulan o usa na ka tuig nga wala na gayud kini siya giregla o wala na miabot ang kada bulan nga bisita niini.
Apan tungod kay taas-taas pa man ang atong pagahisgutan mahitungod niining imong sitwasiyon, tugoti ako nga ato kini nga padayunon og pagtuki sa sunod nga edisyon niining atong patik.
Hangtud sa sunod!
rDr. Fritz
r(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o SunStar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)