GIBATIKOS sa atong pinangga nga Pangulong Rodrigo Duterte ang mga rebeldeng komunista tungod sa pagkabadlungon (spoiled brats) nila.

Sa iyang pagpamulong sa gilunsad nga Hardin ng Lunas sa Presidential Security Group sa Malacañang grounds, ang Pangulo nagpahayag nga iya gyung ibasura ang nagpadayong hinabing pangkalinaw tali gobyerno ug mga komunistang grupo.

Kini tungod sa pagwagtang sa unilateral ceasefire sa New People's Army (NPA) nga naglusad og sunod-sunod nga pagpangatake sa militar.

Ang pangulo nagkanayon nga naningkamot siyang magpaubos sa pagpakigsabot sa komunistang grupo apan nahimo silang arogante.

“I tried my best to make peace with everybody. There's looming danger on ISIS (Islamic State or Iraq and Syria) and here's the communists, I don't want them [because] they're spoiled brats,” suma sa Pangulo.

“They act as if they are part of the government to make demands. There will be [no peace talks]; there will be war. Then peace is not possible during our generation. I'm not about to talk to them again,” dugang pa niya.

Kini nga pahayag miguwa human niya gianunsyo niadtong Sabado, Pebrero 4, nga ang dayalogo tali Communist Party of the Philippines di na mahinayon gawas lang kung dunay “compelling reason” nga mobalik sa hinabing pangkalinaw.

Nagbahad sab ang pangulo ngadto sa mga lider sa komunistang grupo nga gibuhian aron moapil sa hinabing pangkalinaw nga sikupon kon mahibalik

sila sa Pilipinas.

Unang nasikop mao si Ariel Arbitrario dinhi sa dakbayan sa Davao niadtong Lunes sa buntag. Ug wala pa kita masayud kon kinsa unya ang isunod pagdakop.

Sa nahitabo karon, daghan ang mipabor sa atong Pangulo nga nag-ingong “spoiled brats” ang NPA. Gani, daghan ang nanawagan nga pulboson ang maong grupo sa gobyerno.

Alang nako, misiaw ang mga rebelde tungod kay gipasagdan sila kaniadto sa gobyerno. Gani, nakatampo sa pagpakusog sa ilang pwersa ang mga politiko nga mihatag dagkong kantidad nga bayad sa permit to campaign panahon sa eleksyon.

Gawas nila, nakatampo sab ang mga negusyante nga mihatag og revolutionary taxes. Ug labaw nga nakatampo niini kadtong mga opisyales sa militar nga nagpakabuta-bungol lamang sa gihimo sa mga politiko nga miayuda sa mga rebelde nga kaaway sa estado.

Diha bitaw to'y usa ka opisyal sa militar nga akong gipangutana kaniadto: “Sir, di ba subay sa balaod ang si bisan kinsa nga sibilyan nga mopakaon ug moayuda sa kaaway sa estado mahimong idemanda sa korte?”

Siya mitubag nga: “Oo.” Dayon midason ko: “Ug unsa may inyong buhaton ning mga politiko nga tataw kaayo nga miayuda sa kaaway sa estado?”

Siya mitubag sab: “Pare, no comment kami niyan, mahirap na makalaban ang mga politiko.”

Sa inyong tan-aw, di kaha sila ra nga mga opisyales sa gobyerno ang nakapahimong spoiled brats sa komunistang grupo?