SULOP, Davao del Sur -- Nadakpan sa kapulisan ang usa ka 22-anyos nga lalaki kinsa naaktuhang migamit og pekeng salapi alas 7 sa gabii niadtong Lunes, Pebrero 6.

Ang suspek nailhang si Mohamad Macay Bahidi, ulitawo, walay trabaho ug lumolupyo sa Chapter 7, Lopez Farm, Barangay Tienda Aplaya, dakbayan sa Digos.

Gisulti ni Digos City Police Office Investigator Joselito Abrea Cortes nga namalit ang suspek sa duha ka mga grocery stores nga gipanag-iyahan nila ni Jerelyn Daligdig Ando, 47, minyo sa Purok 10 ug Joan Napone Igcalinos, 34, minyo sa Purok 2, pulos sakop sa Barangay Poblacion sa dakbayan.

Apan migamit matud pa ang suspek og duha ka tag-P500 nga pekeng salapi sa duha ka mga tindahan.

Human mireklamo sa kapulisan ang duha ka mga tag-iya sa tindahan, daling nasikop sa mga awtoridad ang suspek ug nakompirma nga peke ang salaping gibayad niini.

Walay nahimo ang suspek human gisikop sa kapulisan ug gipadlak sa prisohan.

Gidason ni Cortes nga kasong paglapas sa Article 168 kon illegal possession and use of false treasury or bank notes ang atubangon niini sa korte.

Giawhag sab sa kapulisan ang publiko nga mag-amping sa pagdawat og salapi human nasayrang adunay mga tawong buot mopalusot og mga pekeng salapi sa dakbayan.