ANG Committee on Women and Children, and Family Relations sa 18th Council sa Davao City nangandam na ugaling mahitabo ang pagpamakwit sa katawhan sa hilit nga lugar sa dakbayan kung mahitabo ang giyera tali militar ug rebeldeng New People's Army human giwagtang ang peace talks.

Si Davao City 3rd District Councilor Avegayle Dalodo Ortiz, chairperson sa maong komitiba, nagbutyag nga kinahanglang mopatunga ang gobyerno sa maong problema sa mga apektadong pamilya.

“Siguro kailangan natin lumapit didto sa gobyerno,” pahayag ni Ortiz atol sa Pulong-pulong ni Pulong sa Sangguniang Panlungsod niadtong Martes, Pebrero 7.

Giingon sab sa batan-ong konsehala nga kinahanglan mosunod unsay pahibalo sa awtoridad aron di maipit sa giyera sa dapit ugaling mahitabo ang engkuwentro.

“We should abide with the military and to safeguard these women and children, kung puwede lilipat muna sila sa kanilang lugar,” sumpay ni Ortiz.

Ang konsehal nagbutyag nga andam ang dakbayan sa butangan sa mga mamakwit ugaling dunay mahitabong giyera sa kabukiran.

“Yes, kung kailanganin, nandiyan naman ang Balay Pasilungan at Bahay Pag-asa,” pasalig ni Ortiz.

Sa laing bahin, nanghinaut si Ortiz nga sa hinanaling panahon ma-aprubahan na ang implementing rules and regulations sa Children's Welfare Code sa dakbayan aron hingpit mapatuman ang mga adbokasiya ug programa sa kabataan sa dakbayan.