GISUGDAN na sa Cagayan de Oro City Police Office (Cocpo) ang internal cleansing ngadto sa tanan sakop sa kapolisan ning dakbayan sa Cagayan de Oro.

Kini ang gibutyag ni Police Chief Inspector Mardy Hortillosa, tigpamaba sa Cocpo ug miingon nga ang panglimpyo sa hanay sa kapolisan gisugdan sa usa ka surprise inspection.

Gisusi niadtong Lunes, Pebrero 6, ang tanan nga mga sakyanan ug motorsiklo sa polis kung insakto ba ang mga papeles, rehistro ug uban pa ingon man kon makaya ba sa usa ka polis ang makapanag-iya ug high end nga mga sakyanan.

Dinhi sa dakbayan, gibutyag niini nga aduna silay intelligence group nga gimugna diin gilangkuban kini sa mga polis nga gipili ug maayo, ug sila maoy mosusi og tagsa tagsa ngadto sa mga polis nga adunay mga gikalambigitan sa tanan matang nga ilegal.

Hinuon gibutyag niini nga sa pagkakaron, ongoing pa ang monitoring ngadto sa mga polis kon kinsa ang adunay mga gikalambigitan.

Kahinumduman gimando ni Philippine National Police Chief General Ronald dela Rosa nga sa paghunong nila sa giyera kontra droga unahon nila ang ilang hanay sa paglimpyo diin gitawag niining “war on scalawags.” (SVB)