ABANTE na ang Philippine lawn tennis team sa sunod nga round human gipilde nila ang Indonesia, 4-1, atol sa Davis Cup Asia Group II first round niadtong Dominggo, Pebrero 5, sa Philippine Columbian Association open clay court sa Paco, Manila.
Gisilyo nila Ruben Gonzales ug Alberto Lim ang kadaogan human gipangpilde nila ang ilang kadaiyang kaabang sa kataposang duha ka rounds, sunod-sunod, sa kataposang adlaw sa Philippines-versus-Indonesia match.
Giharus sa beteranong si Gonzales si David Agung Susanto sulod sa tulo ka sets sa iskor 6-2, 6-3 ug 6-4, samtang giparot ni Lim ang manghod nga Susanto nga si Anthony sa iskor 7-5 ug 6-3.
Naglabaw ang RP Davis Team sa ika-duhang adlaw sa match human gidaug sila Treat Huey ug ang Kagay-anong si Francis Casey Alcantara sa doubles match.
Gipilde nila Huey ug ang garbo sa Barangay Nazareth Tennis Courts sila David Agung ug Sunu-Wahyu Trijati, 6-2, 6-4, 6-4.
Nagtabla ang Pilipinas ug Indonesia sa unang adlaw sa one-all.
Nasalabong una og pilde ang RP Team human miretiro si Lim sa desisyon nga set sa first singles batok kang David.
Apan, gisalbar ni Gonzales ang nasod agi sa 6-2, 6-2, 6-4 nga harus batok kang Aditya Hari Sasongko sa second singles.
Maatbang sa Pilipinas ang Thailand sa ika-duha nga round karong Abril 7 hangtod 9 sa Bangkok, Thailand.