GIPAMUSIL patay ang tulo ka mga lalaki sa wala mailang mga suspek sakay sa duha ka motorsiklo niadtong Lunes sa gabii, Pebrero 6, sa Lower Ganghaan, Barangay Sta. Cruz, dakbayan sa Tagoloan, Misamis Oriental.

Nagbuy-od nga naligo sa kaugalingon nga dugo sila Mark Lester Dacubor, Carlo Dacubor, pulos taga San Martin, dakbayan sa Villanueva, Misamis Oriental, ug Rolly Ello, 33, adunay kapuyo, residente sa susamang dapit.

Samdan usab si Eduardo Caculba, 28, taga San Martin, dakbayan sa Villanueva, human naigo sa iyang paa nga bahin ug anaa karon nagpatambal sa Northern Mindanao Medical Center (NMMC) sa Cagayan de Oro.

Sa inisyal nga imbestigasyon sa Tagoloan Police Station ubos kang Police Chief Inspector Albart Tare, nasuta nga didto kining mga biktima nagtambay sa usa ka payag dihang niabot ang mga suspetsado nga sakay sa duha ka mga motorsiklo.

Gipamusil hinungdan nagkalampag ang tanan ug nag-iyahay og pagpangdagan hinungdan didto kini sila naabtan sa nagkalain-laing bahin sa kasagbutan sa dapit.

Sagad kanila nakaangkon og mga samad pinusilan sa ulo ug dughan ug nakaangkon og duha ka mga samad sa lawas.

Kini sab ang usa sa giimbestigahan sa kapolisan kon unsay gihimo sa upat ka mga biktima sa payag labina gidudahan nga posibleng nag-pot session ang mga biktima.

Adunay mga silingan nga nakiusyuso tungod sa grabeng nadungog nga buto ug ilang namatikdan ang giingong upat ka mga lalaki.

Ingon nga ang mga suspek nagsul-ob og taptap sa nawong, nagkalo ug nagsul-ob og jacket nga pulos kolor itom. Misakay dayon sa motorsiklo paingon sa wala matinong direksyon.

Ning panahona, blanko gihapon ang kapolisan kon kinsa ang mga responsable sa pagpamusil sa mga biktima.

Apan dako ang ilang pagduda nga aduna kini kalambigitan sa ginadili nga droga gumikan kay si Ello giingong nakuhaan og lighter lakip ang cellophane nga gitouhang adunay drug residue.

Ang kaipon ni Ello nga si Irene nihulagway nga lambing kaayo iyang bana hinungdan dili siya makatoo nga gipatay kini.

Hinoun giangkon niini nga gagamitan kini og ginadili nga droga ug gakadala lamang sa iyang barkada.

Ang mga biktima pulos gidala sa punerarya sa dakbayan sa Tagoloan.