SUGDAN na karong buntag ang gikahinaman nga panagtigi tali sa Golden State Warriors ug Cleveland Cavaliers sa 2014-15 NBA best-of-seven finals.

Ang Warriors (67-15)  nga maoy no.1 team sa regular-season, maoy niguwang inilog ning maong panagtigi batok sa Cavaliers (53-29) tungod kay gawas nga anaa kanila ang homecourt advantage, mas  halawom usab ang ilang bench.

Kon maminusminusan ang ilang turnovers unya mangigo usab ang gitawag og Splash Brothers nga sila si Stephen Curry ug Klay Thompson sa three-point land, way rason nganong dili matambalan sa Warriors ang 40  ka tuig nilang kahidlaw sa titulo.

Sa kasaysayan sa NBA, napulo ka teams ang mikutlo og 67 o kapin ka daog sa regular season apan di nato malalis nga ang Warriors maoy adunay pinakalisod nga naagi-an ilabi na sa playoffs.

Gawas sa duha, ang Warriors ni coach Steve Kerr ug sa nailang  defensive coach Ron Adams anaa usab sila si Harrison Barnes; Draymond Green, ang runner-up sa Defensive Player of the Year award nga makahatag og kalisdanan ni Lebron James. Di usab ikasalikway ang opensa ug depensa sa beteranong si Andre Iguodala.

Sa nahisgutan sa unahan, daw anaa kanila ang elemento sa usa ka champion team bisan tuod og kini maoy unang higayon sukad sa nahimo sa Jazz niadtong 1997 nga ang team miabot sa finals nga way bisag usa ka player nga adunay championship experience.

Apan di usab nato dali-daling ikasalikway ang kapabilidad sa Cavaliers. Samtang si Curry adunay dekalidad nga mga backups di usab ikalimod nga bisan pa man sa pagkawagtang ni Kevin Love ug sa pagka-injured ni Kyrie Irving, si James nakakuha og igong suporta nila ni Iman Shumpert, J.R. Smith, Matthew Dellavedova sa perimeter area. Ang panagparis nila ni Tristan Thompson ug Timofey Mozgov igo kaayong ikatugbang sa tandem nila ni Andrew Bogut ug David Lee sa Warriors sa ilawom nga bahin.

Madugangan pa unya kon ang hingpit og galing mahingpit na unya ang pagkaalim ni Irving.

Much more, ang championship experience ni James ug ang liderato nga iyang napruybahan maoy usa sa lig-ong puhonan sa Cavaliers nganong andam silang mosakmit sa kampiyonato.

Sa lima ka finals appearance ni James, siya sayod nga di niya mahimong mag-inusara aron paglangkat sa titulo. Bililhon ang pagpakig-ayuda – kini maoy leksiyon nga iyang nakuha ilabi na sa kapildihan sa Miami Heat sa niaging tuig sa mga kamot sa San Antonio Spurs.

Cleveland in Game 7. (junmigs0622@yahoo.com)