Barrita: Obstruction of justice

TULO ka mga batan-ong abogado sa usa ka bar sa Makati City sa kaulohan gidakop sa kapulisan niadtong Agusto 16 tungod sa kasong obstruction of justice, resistance and disobedience, constructive psosession of illegal drugs ug crossing a police line.

Gironda sa kapulisan ang maong bar tungod sa gikatahong pagpamaligya og party drugs. Ang tulo, nga maoy mga abogado sa tag-iya sa maong bar, gibuhian ubos sa mando sa piskaliya sa alas 8 sa gabii sa pagkasunod adlaw, Agusto 17. Sa ato pa wa dawata sa piskaliya ang mga alegasyon sa kapulisan.

Mao nga atong hisgutan pagbalik ang obstruction of justice nga gisilotan ubos sa Presidential Decree 1829 (Penalizing Obstruction of Apprehension and Prosecution of Criminal Offenders) nga giluwatan niadtong Enero 16, 1981. Nagtubag kini sa way pagpakabana sa publiko sa pagsikop ug pagtaral sa korte sa mga nakalapas sa balaod.

Ang obstruction of justice adunay silot nga pagkapriso gikan sa upat ka tuig, duha ka buwan ug usa ka adlaw ngadto sa unom ka tuig ug multa nga P1,000 ngadto sa P6,000. Kon ang nakalapas niini usa ka public officer, lakip sa silot ang perpetual disqualification from holding public office.

Lakip sa gisilotan niini ang pagpugong sa mga saksi sa pagtestigo sa bisan unsang criminal proceeding o pagtaho sa usa ka krimen ug sa nakahimo niini pinaagi sa pagsuhol, pangilad, paggamit sa kusog ug pagpanghulga. Ang pag-usab, pagdaot, pagpugong ug pagtago sa bisan unsang papeles, record, dokumento o butang aron di magamit nga ebidensiya sa bisan unsang imbestigasyon o criminal proceeding.

Laing gisilotan mao ang pagpapuyo, pagtago ug pagtabang nga makaeskapo sa usa ka tawo nga iyang gituohan o gisuspetsahan nga nakahimog krimen aron di masikop ug mataral sa hukmanan. Ang paggamit og di tinuod nga ngan aron pagtago sa usa ka krimen ug aron di mataral sa hukmanan.

Gisilotan sab ang paglangan sa pag-prosecute sa usa ka kaso pinaagi sa pagbabag sa pagsilbi sa mga order sa korte ug pagsamok sa proceedings sa piskaliya. Ang paghimo ug pagpresentar sa mga papeles ug dokumento nga makausab sa resulta sa usa ka criminal proceeding.

Ang pagpangayo, pagdawat ug pagsugot nga modawat sa bisan unsang benepisyo aron di mosalmot, moundang sa pagsalmot ug paglangay sa pag-prosecute sa usa ka criminal offender.

Gisilotan usab ang pagpanghulga sa usa ka tawo ug sa mga sakop sa iyang banay aron di siya motunga sa imbestigayon, ingon man sa paghatag og minamao-mao nga impormasyon aron di masikop ang nakahimog salaod. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph