KINING gihugon-hugon nga pagbali o paglayat sa mga sa­kop sa Team Rama sa konsiho ngadto sa Bando Osmeña Pundok Kauswagan (BOPK) posibleng mahitabo kini sa umaabot nga mga adlaw. Kay kining ubang mga pulitiko walay baruganan ug dugukan. Ang ila lamang mao ang personal interest, political convenience ug political survival. Asa tong maka-ayo nila ug diin siguro silang mapili pag-usab o siguradong makadaog, adto sila. Unsa-on man nag political party loyalty ug dili makapadaog kanimo. Huyang na ang Team Rama human mapilde ang ilang lider nga si kanhi Mayor Mike Rama. Ingon ana man gyud ang pulitika. Kinsa tong anaa sa puwesto maoy gamhanan.

Kusog kaayo ang huhungihong nga sila si Konsehal Gerry Guardo, Pastor “Jun” Alcover ug Association of Barangay Council (ABC) president ug ex-officio member Felix Zafra ang molayat na ngadto sa BOPK. Una nang mideklarar og independence (kuno) sila si Konsehal Hanz Abella ug Dave Tumulak. Independente kuno sila pero ang ilang mga nilihukan atoa na sa kampo sa BOPK. Hinuon, gipanghimakak nila ni Guardo, Alcover ug Zafra ang maong mga tabi-tabi. Si Zafra, matod pa, mi-file og indefinite leave of absence. Ngano man kaha? Naglibog pa siya?

Nganong naka-ingon ko nga dili layo ug posible kining mahitabo? Gumikan kay kini laging mga pulitiko walay baruganan ug dugukan. Ug ang uban daling mahaylo sa position o ba kaha salapi. Sumala ug unsay nahitabo ni Konsehal Mary Ann Delos Santos? Kontra kaayo sila si Mary Ann ug ang “kanhi laos nga pulitiko” nga maoy lider sa BOPK. Gani nahimo namang personalan ang ilang away sa pulitika. Mi-atbang pa si Mary Ann midagan pagka-mayor. Apan unsay nahitabo? Mitapon si Mary Ann sa BOPK. Gitulon ni Mary Ann ang iyang prinsipyo ug garbo gumikan sa iyang pulitikanhong ambisyon. Mao nay usa ka ehemplo sa pulitiko nga walay dugukan. Morag alibangbang.

Dugay na nako kining gihimadlan si Gerry Guardo nga posibleng motapon sa BOPK gumikan sa igsoon nga si Atan Guardo nga atoa na misuporta sa BOPK human nakigbangga sa kanhi laos nga pulitiko. Una nakong gihimadlan mao sila si Hanz Abella ug James Cuenco apan wala modayon si James. Si Dave nga maoy medyo loyal unta sa Team Rama mao naman hinoon ang unang milayat. Gumikan gihapon sa ambisyon.

Usa sa nakapabali si Tumulak kanang posisyon nga iyang gihuptan karon nga deputy mayor for police matters kay gusto man na siyang magpapulis-pulis. Samtang si Alcover usa sa mga kritiko sa “kanhi laos nga pulitiko” pero dili nato matagna kay basin og mahaylo pod. (bobby@sunstar.com.ph)