DUHA ka managlahing mga kaso sa paregla ang nahitabo sa dakbayan sa Lapu-Lapu kagahapon sa kadlawon ug sa miaging gabii.

Labing uwahing insedente nahitabo kagahapon sa alas 4 sa kaadlawon duol sa Mactan Air Base gate, Sityo Sangi, barangay Pajo sa naasoyng dakbayan sa dihang ang biktima nga si Dexter Mansueto, 29, lumad nga taga-Napo, lungsod sa Argao, Sugbo ang gikatahong giatake sa nervous breakdown.

Base sa inisyal nga inpormasyon nga nahipos sa Homicide Section sa City Police Office nga sa wala pa ang pagpanunggab sa biktima, nianang pagka-gabii ingon sa gibati og tumang kahadlok ang biktima kay matod pa adunay buot mopatay kaniya.

Apan nianang pagka-kadlawon, kalit nga nagwala si Mansueto gawas sa iyang temporaryong gipuy-an ug nalabyan sa duha ka mga lalake nga luwan sa motorsiklo ug kalit nga misumbag sa nag-amok nga biktima.

Wa pa matagbaw ang mga suspek, gidunggab ang biktima nga nanglimbasog sa pagsukol sa dihang gisigehan og kulata.

Gidudahang ice pick maoy gigamit sa wa mailhing mga lalake nga niresulta duha ka nga lawom nga samad sa iyang buko-buko gawas sa mga bun-og diha sa iyang nawong. Si Mansueto nagpaalim sa iyang samad sa City Hospital.

Sa laing bahin, 28 anyos nga estambay ang biktima sa pagpamusil.

Si Rodelio Formentera kinsa nagkalingaw og inom uban sa iyang higala nga naila lang sa pangalan nga Jun-Jun sa Sityo Saac, barangay Buaya, Lapu-Lapu, niadtong Miyerkules sa gabii gipusil.

Duha ka mga lalake ang kalit mibutho sa dapit nga ilang giimnan ug namusil tumong ni Formentera nga naigo sa iyang tuong bukton. Ang biktima way kalibutan kon unsay rason nga siya gitinguhang patyon.

Ang kapulisan padayon nga nangita sa mga suspek kinsa dali nga mibiya sa managlahing nahitaboan.