PADAYON ang lakang sa Department of Health (DOH) 7 sa pagpakgang sa nagkataas nga kaso sa dengue sa Central Visayas (CV) atol usab sa ika-5 ka tuig nga kasaulogan sa ASEAN dengue celebration karong tuiga batok niining sakita.

Kagahapon, subay sa maong selebrasyon, aduna sila’y gipahigayon nga kalihukan sa Cebu City Central School, dakbayan sa Sugbo ug ilang gipang-lecture ang mga tinun-an sa grade six kabahin sa dengue ug kon unsaon kini pagpakgang.

Sa tuig 2015, walay natala ang Department of Education (DepEd) 7 nga mga tinun-an sa CV nga biktima sa dengue.

Sa miaging tuig adunay 27 ka mga tinun-an sa pre-school, elementary ug high-school ang natala sa DepEd 7.

Matod sa supervising dentist sa DepEd 7 nga si Dr. Berna Ysulan nga bisan pa man nga wala sila’y budget nga gigahin sa maong sakit, apan nag-monitor sila niini.

Base sa datus sa Regional Epidemiology & Surveillance Unit nga mas nisaka pa og 20 porsyento ang kaso karong tuiga sa dengue sukad sa Enero hangtod Mayo itandi niadtong miaging tuig.

Sa kinatibuk-an, dunay 2, 0­45 ka mga kaso sa dengue ang natala sa 2015 diin siyam niini ang patay.

Niadtong tuig 2014, dunay 1,712 ka mga kaso lang ang natala sa Resu diin, pito niini ang namatay sa tibuok rehiyon 7.

Matod ni Dr. Jonathan Niel Erasmo ang dengue program coordinator sa DOH 7 nga nagpabilin nga nag-una ang siyudad sa Sugbo nga aduna’y kaso nga 407 karong tuiga diin duha niini ang patay samtang 348 lang ang natala nga kaso sa 2014 ug usa lang ang patay.

Ikaduha ang syudad sa Lapu-lapu sa 89 ka kaso sa 2015 ug 150 niadtong miaging tuig samtang ikatulo usab ang syudad sa Toledo nga aduna’y 81 ka kaso karong tuig, usa niini ang patay samtang wala’y natala sa tuig 2014.

Nitataw si Erasmo nga usa ka urban nga sakit ang dengue mao nga sagad sa nag-una nga daghan ang biktima mao urban nga mga lugar kun kadtong naa sa siyudad.

Lakip sa top 5 karong tuiga ang Dumaguete city sa 77 ka kaso karong tuiga, 116 niadtong 2014 ug lungsod sa Liloan nga adunay 63 ka kaso karong tuiga ug 20 niadtong 2014.

Magpabilin nga buhaton ang 4pm habit matag adlaw aron sa pagpakgang sa dengue diin mangita ang publiko sa lugar sa ilang balay nga pwede itlogan sa lamok kun gitawag nila nga “search and destroy.”