DUHA ka mga signal jammers ang hingpit nang gitaod sa Cebu Provincial Detention and Rehabilitation Center (CPDRC).
Kini aron mapakgang na ang komunikasyon sa mga piniriso nga nagtinir og mga cellphone sa maong bilanggoan.
Samtang duha ka mga piniriso nga nasakpang nigamit gihapon sa ilang mga Facebook account, gidid-an na pagdawat og mga dalaw.
Si Provincial Security officer, Bobby Legazpi, personal nga ni-supervise sa pagmuntar sa jammers ug matod niya, duna pay dugang jammers nga ilang ibutang sa mosunod nga mga adlaw.
Gitug-an niya nga upat ka mga area sulod sa CPDRC compound maoy ilang butangan sa maong kahimanan.
Si CPDRC acting warden, Dr. Gil Macato, sa iyang bahin nihulagway nga dako’g tabang sa gipatuman nilang seguridad sa prisohan ang pagmuntar na sa mga signal jammer.
Nagtuo siya nga duna gihapoy pipila ka mga piniriso nga dunay tinagu-an nga mga cellphone ug uban pang communication gadget.
Niadtong Martes, nakasakmit sila ug upat ka mga cellphone gikan sa mga selda sa duha ka mga piniriso, nga nasakpang nagsige gihapon ug gamit sa ilang mga FB account.
Ang mga piniriso nga silang Rosella Kintanar ug Christopher Pitogo, gidid-an una nga makadawat ug mga bisita human sa kalapasan nga ilang nahimo.
Gawas niini, si Pitogo gibutang usab sa bartolina.
Bisan ug duna nay signal jammers sa CPDRC, duna gihapon kini service phones sa administration Office nga mahimong magamit sa mga piniriso nga dunay importanteng tuyo sa ilang mga kabanay o kaha abogado sa gawas.
Dili ra usab maapektohan niini ang komunikasyon sa hand-held radio sa mga gwardiya sa prisohan, nga gamit kaayo subay sa seguridad nga ilang gipatuman sa compound.