GITAKTAK na sa ka­dagkuan sa Cebu Technological University (CTU) ang lima ka mga aktibo nga empleyado nga gilakip sa walo ka mga opisyal nga gipa-dismiss sa Office of the Ombudsman human sa kalapasan sa Republic Act 3019 o ang Anti-Graft and Corrupt Practices Act ug Grave Abuse of Authority and Misconduct.

Lakip sa gikatak nga aktibo pa sa serbisyo sila si Jerlito Letrondo, chief administrative officer; Normita Mejala, Finance Manager II; Gilminarde Santos, Accountant IV; Ruth Mangaya-ay, disbursing officer ug si Ruel Tillor, Internal Auditor.

Samtang ang mga retirado nga lakip sa kaso nga sila si Bonifacio Villanueva, kaniadto presidente ug Pontiano Bontia, kanhi campus director, usa ka tuig nga sweldo ang kinahanglan niini bayaran sa Ombudsman diin mamahimo usab kini nga i-deduct sa ilang retirement benefits.

Nasayran nga kalapasan ang gihimo sa Board of Management human gi-aprobahan niini ang P3,000 nga representation expenses matag buwan alang kang Santos diin niabot ang tanan og P63,000 sukad Agosto 2011 hangtod Abril 2013.