HINGUSGAN sa Lapu-Lapu City Police Office (LLCPO) ang kampanya batok sa kolorum nga mga tricycle unit nga nagdagan sa nagkadaiyang dapit sa Lapu-Lapu.

Gikatakda nga sunod semana ilusad ang Ope­ration Linis Kolorum base sa kamanduan ni PSSupt. Rommel Cabagnot, city police director.

Gipahibawo sa opis­yal nga ka duha sud sa usa ka semana himuon ang maong operasyon sa nagkadaiyang dapit sa dakbayan diin naghitak ang mga traysikol.

Ang maong operas­yon inabagan sa City Traffic Management System (CTMS), Land Transportation Office (LTO) lakip ang hingtungdan nga police station, SWAT ug sakop sa Intelligence Branch.

“Naa na tay daghang napa-impound (tricycle units) but wa lang ni mahibaw-i kay naka-focus man gud ta sa Tokhang,” tipik sa pa­mahayag ni Cabagnot sa dihang nahinabi sa mga tigbalita.

Nasayran nga usa sa angulo nga gisubay sa pag­pusil-patay sa traffic enforcer Raquel Bensi niadtong hinapos nga bahin sa Enero samtang nagdumala sa trapiko sa barangay Basak, mao ang iyang higpit nga pagpatuman sa ‘batas-trapiko’ ilabi na batok sa kolorum nga mga traysikol.

Ang kaso ni Bensi gi­dudahan nga may kalabutan sa iyang trabaho isip enforcer.

“Kanang tanang kolorum dakop na gyud ron,” pahimangno ni Cabagnot ilabi na nga gi-undang sa kapulisan ang Tokhang ug mo-divert sila sa laing operasyon.

Ang nahisgutang ope­rasyon kabahin sa upat ka parameter nga gipatuman ni Cabagnot ngadto sa matag police station sa Lapu-Lapu nga naglakip sa Oplan Katok (unlicensed firearms), Oplan Kolorum, pagsulbad sa krimen ug pagsikop sa top 10 most wanted person.

Buot ni Cabagnot nga adunay agi ang lima ka police station sa Lapu-Lapu City pinaagi sa iyang gipangayo nga requirements sa upat ka parameters aron pagsiguro nga nanarbaho ang iyang mga sakop ilabi nga gi-undang ang Oplan Tokhang.