WALAY mafia dinhi sa Sugbo.

Kini ang pagklaro sa mga opisyal sa Consulate of the Republic of Korea sa Sugbo nunot sa nanggawas nga mga balita labot sa giingong presensya sa Korean mafia.

Si Consul Lee Yong Sang niangkon atol sa press conference sa Police Regional Office uban ni Consul General Oh Song Yun nga dunay wanted nga mga Koreano nga nakahimo og salaod sa ilang nasud nga nagtago-tago dinhi sa Sugbo niadtong mga tuig 2009 ngadto sa 2013.

Apan giingong napabalik na kini sa nasud sa Korea pinaagi sa pag-deport.

Sa ilang pagtago-tago dinhi sa Sugbo giisip na sila nga individual criminals ug gitawag nga gangsters.

Gibana-bana nga moabot ngadto sa 20 ka mga Korean criminal nga niabot sa Sugbo aron motago, lima ngadto sa unom niini giingong miyembro sa Korean gangs.

Kasagaran sa mga kaso niini estafa sa ilang nasud ug ubang mga dagkong krimen.

“Some of them were convicted for etafa and some of them were convicted in vehicular injuries and other serious crimes in Korea,” matod ni Yong Sang.

Apan iyang giklaro nga kasagaran sa nagtago-tago dinhi nga mga Koreano nga dunay kaso sa ilahang nasud di mga sakop sa usa ka organized crime group gawas lang sa lima ngadto sa unom ka mga personalidad.

Dugang niya nga ang pulong nga Korean mafia nakahatag ug kabalaka kanila ilabi na sa mga turista nga buot mobisita sa Sugbo.

Si Bong Hwan Cho, presidente sa Cebu Korean Association, nagkanayon nga human makabasa sa balita labot sa presensya sa Korean mafia, mibati na sila og kahadlok ug way bisan usa nga nangayo kanila og pagpasabot kon kini tinuod ba.

Si Police Regional Director Chief Supt. Noli Taliño padayon nga misuporta sa pamahayag ni Presidente Rodrigo Duterte labot sa pagtuo nga dunay Korean aafia nga naglihok sa Central Visayas apan kinahanglan pa kini nga ipaubos sa pakisusi.

Nagtuo ang police opisyal nga gidasunan usab sa Korean consul general nga duna pay nagtago-tago dinhi sa Sugbo nga wa nila ma-monitor tungod sa kadaghan sa mga Korean citizen nga kasamtangan nga nagpuyo dinhi.

Nanghinaot si Taliño nga di masukwahi ang iyang pamahayag labot sa Korean Mafia kon naa pa ba kini dinhi sa syudad sa Sugbo.

Matod ni Consul Lee nga dunay kapin sa 25,000 ka mga koreano nga naa dinhi diin katunga niini mga tinun-an samtang ang uban turista.

Sukad niadtong 2014 hangtod karon, gipahibawo sa Korean consul sa Cebu nga wa nay natala nga krimen nga naglambigit sa mga Koreano.

Wa pay nadawat nga impormasyon ang consul general Oh Yun nga duna nay mga turistang Koreano nga mikansilar sa ilang byahe sa Sugbo human mitumaw ang maong isyu.