KATORSE anyos pa siya, apan usa na siya ka tighatod og illegal drugs.
Nagdako siyang way mga ginikanan human mabilanggo ang iyang inahan sa National Bilibid Prisons (NBP) sa Muntinlupa City.
Namatay usab ang iyang amahan hinungdan nga nagtubo siya pinaagi sa abag sa iyang apohan.
Si John (tinuod ngan gipugngan kay menor de edad) nadakpan sa laing operasyon sa Philippine Drug Enforcement Agency (PDEA 7 kagahapon sa alas 3:15 sa kaadlawon sa dan A. Lopez, Barangay Calamba, dakbayan sa Sugbo.
Si John tinun-an sa Grade 1, taga Bliss Labangon, nakuhaag duha ka dagkong bulto sa shabu nga nitimbang og 100 gramos nga balor og P300,000.
Si John maoy nitunol sa mga ahente sa PDEA 7 atol sa transaction dihang gisugo sa usa ka ‘Jeje” nga maoy giingong iyang amo.
Si John nga nahinabi sa Superbalita Cebu niangkon nga courier siya sa illegal nga drugas ug makadawat og P2,000 matag transaction sa panahon nga suguon siya ni Jeje.
Napugos siya pagsulod isip tig-deliver sa drugas human namatay ang iyang apuhan.
Ang iyang inahan nabilanggo sa NBP dihang nag-edad pa lang siyag 2 anyos samtang namatay sab ang iyahang amahan.
Upat sila ka managsuon.
Ang iyang maguwang nga 27 anyos nabilanggo sa Cebu City Jail tungod sa drugas.
Ang iyang igsuong bayot namaligyag pantalon ug mga bag nga ukay-ukay.
Duna siyay manghod na 11 anyos nga babaye.
Kon siya makakwarta, iya kining ipalit og sud-an.
Hatagan sab niya ang uban niyang mga igsuon, apan wa niya sultihi kabahin sa drugas, gawas sa iyang maguwang.
“Ako lang kuya nga naa sa city jail ako gipahibalo nga nag-courier ko pagdu-aw nako niya. Gitambagan ko nga mag-amping kay lisod kaayo nga illegal akong trabaho,”dugang ni John.
Hatagan niyag kwarta ang iyang maguwang nga tag P500 matag duaw niya sa bilanggoan kay naluoy siya niini.
Sumala pa niya nga dinagko nga balor sa drugas ang ipabiyahe ni ni Jeje kaniya.
Mohatud siya sa bisan asang lugar sa Mero Cebu sakay sa taxi samtang sugaton sa mga buyer nga maghabal-habal.
Si PDEA Regional Director Yogi Felimon Ruiz nipadayag nga tinud-on nila og kiha si John kay sa ilang nahibaw-an duna nay daghang record ang maong menor nga gidakpan sa samang kaso.
Nakig-alayon na siya sa Department of Social Welfare and Development (DSWD) kabahin sa pagpasaka nilag kaso batok sa menor de edad aron magsilbing leksyon sa mga sama kaniya.