KANHI pulis nga mi-absent without official leave (Awol) nasikop sa Philippine Drug Enforcement Agency (PDEA) sud sa usa ka drug den sa Brgy. Calamba, dak­bayan sa Sugbo.

Apan ang pulis nanghimakak nga namaligya siya og drugas kay usa lang siya ka tiggamitan kaniadto.

Nadakpan sud sa giingong drug den sa dan A. Lopez si kanhi PO1 Julius Cuyos, 38, minyo, taga Bliss, Labangon,dakbayan sa Sugbo.

Si Cuyos katapusang nadestino sa Provincial Investigation and Detective Management (PIDMB) sa Cebu Provincial Police Office (CPPO) niadtong 2015.

Nasikop uban kaniya sila si Edgar Rafols, 67, minyo, giingong tag-iya sa drug ug si Grace Escopete, 35, nagpailang katabang.

Si Rafols kanhi kawani sa Cebu city hall.

Nakuha gikan kanila ang 50 gramos nga shabu, mobalor og P130,000, daghang drug paraphernalia ug cash nga gituohang halin sa drugas.

Samtang wa madakpi ang ilang high value target nga si Marites Aniñon, kinsa nakapyansa sa kaso sa drugas.

Matod ni PDEA 7 Regional Director Yogi Felimon Ruiz nga naniid sila sud sa usa ka semana sa dapit.

Ilang gipalitan si Aniñon og usa ka putos sa shabu apan nakadagan dihang nakabantay kinsa ang nipalit kaniya.

Si Ruiz nibutyag nga didto sa sulod sa drug den ni Rafols sila si Cuyos ug Escopete, nga pulos nakuhaan og binultong drugas.

Gihimong one stop-shop ni Rafols ang iyang suyopanan sa dugay na nga panahon base sa mga test buy nga gihimo.

Si Ruiz niingon nga ilang susihon angg record Cuyos ug palawman ang imbestigasyon aron masuta kon unsay laing gikalambigitan niini.

“Didto man siya naaktuhan nato nga visiting drug den. Unya nagkupot sab siyag illegal nga drugas kuyog sa kauban didto. Atong tan-awon kung unsay kalambigitan,” dugang ni Ruiz.

Hinuon gipasabot niya nga di mabutang nga protector si Cuyos di na aktibo sa pagkapulis human gitangtang sa listahan.

Nanghimakak

Si Cuyos nga nahinabi sa Superbalita Cebu, niingon nga siya nibisita kang Rafols nga iyang higala.

Si Rafols giingong nagpaayo kaniya og antenna sa TV.

Nakahibawo siya nga drug den ang maong dapit, apan ang iyang tuyo pagtabang lang sa pag-ayo sa antenna sa TV sa iyang higala dihang natigayon ang operasyon sa PDEA-7.

Gitug-an niya nga nadawat siya sa pagka pulis niadtong 2007 ug nadestino sa Mandaue City Police Office (MCPO).

Katapusan niyang assignment sa PIDMB-CPPO niadtong 2015, diin siya mi-awol.

“Wa na koy pamilite sa pagtrabaho, sir, mao nga mi-awol ko. Naputos sa utang lagi, unya problima sa pamilya. Mosuyop sab ko. Karon wala nay kay wala naman koy ikapalit,” dugang ni Cuyos.

Si Sr. Insp. Nazarino Emia, deputy sa PIB-CPPO, nikompirmar nga gitangtang na gikan sa listahan sa aktibo sa serbisyong mga pulis si Cuyos.

Samtang si Rafols nibutyag nga human siya niretero isip trabahante sa City government, namaligya siyag tin-foil nga tag P5 matag gamay nga lukot alang sa pagsuyop.

“Wa koy income gutom akong pamilya. May’g mohatag na atong mga silingan maong namaligya nalang kog tin-foil. Pero wa ko kahibalo asa nila gipalit ang shabu. Tin-foil ra akoa negosyo,” dugang ni Rafols.

Si Escopete, nangangkon nga nagbantay siyag bata niadtong higayuna dihang nahitabo ang operasyon.

Apan giangkon niya nga mosuyop siyag drugas.