Miller aduna pa’y ikabuga alang sa nasod

ADUNA pa’y igong enerhiya si Willie Miller sa iyang paghangop og bag-ong hagit isip basketbolsita bisan sa iyang pangidaron nga nagdagan na paingon sa 40.

Si Miller nagpanikad human siya gikuha sa Mighty Sports aron morepresentar sa Pilipinas alang sa 2017 Dubai International Championship nga ipahigayon sa ulahing bahin ning buwana.

Dili na man tuod sama ang iyang katakos sa dihang nagduwa pa siya Philippine team ubos sa paggiya ni coach Yeng Guiao walo na ka mga tuig ang nakalabay apan andam si Miller nga ipagawas ang tanan niyang makaya alang sa nasod.

“Napakaganda to sa mga players, active or not, pag nakuha ka ire-represent mo yung Pilipinas, iba ‘yung feeling e,” pasabot ni Miller sa interbyu sa Spin.ph.

“Itong chance na to, nasa uniform namin is Pilipinas. Napakasarap sa feeling.”

Sa praktis, gipakita ni Miller nga kaya pa niyang mokombati sa mas batan-ong mga kaatbang.

“Parang bata no? Parang bata sa kalokohan,” sagol komedya nga asoy sa kanhi MVP sa Philippine Basketball Association (PBA).

Sa iyang pagretiro sa PBA, wala mibiya sa hingpit si Miller sa basketball ug padayon siyang nagpakondisyon pinaagi sa pagpahigayon og basketball clinics.

Giangkon ni Miller nga kinahanglan pa niyang magpakondisyon og insakto alang sa iyang tinguha nga makatabang sa Mighty Sports.

Malaumon si Miller nga mahibalik ra ang iyang saktong kondisyon sa umaabot nga mga adlaw.