MAKAPAHINAM nga raffle prizes ang mahimong madaog sa mga partisipante sa 7th edition of SM2SM Run karong Pebrero 19 sa North Open Parking Area, SM City Cebu.
Pito ka runners ang mahimong makadaog og libreng tiket paingon sa Hongkong, usa sa grand raffle prizes sa kalihukan.
Mahimo sab nga makadaog og pito ka Feria buffet for two sa Radisson Blu Hotel, pito ka Samsung Tablets, pito ka Samsung S7 Series, pito ka BE Resorts gift certificates nga magamit sa Mactan Island ug Bohol, pito ka overnight stay gift certificates sa Radisson Blu Hotel Cebu ug pito sab ka mga Samsung flat screen TV.
Nagkanayon si SM senior public relations manager Rj Leduna nga miabot na ngadto sa 5,000 ang nakaparehistro kagahapon.
Ang lumba, nga alang sa benepisyo sa Cebu Newsworkers Foundation, Inc. (CENEWOF) ug The Children of Cebu Foundation, Inc., gilaumang makahakot og 7,000 runners nga magginukdanay sa men’s/women’s 21-kilometer, 12K, 7K ug 3K categories.
Mokabat ngadto sa P500,000 ang kinatibuk-ang ganti sa lumba diin P70,000 ang maangkon matag usa sa mga modaog sa 21K, P40,000 sa 2nd placers ug P25,000 sa 3rd placers.
Ang rehistrasyon nagbalor og P950 sa 21K, P750 sa 12K, P650 sa 7K, ug P550 sa 3K. Ang mga estudyante nga makapakita og ID makakuha og P100 discount.
Magpadayon ang rehistrasyon hangtod karong Pebrero 15 sa 2nd level sa The Northwing ug upper ground level duol sa Adidas sa SM City Cebu.