NIPADAYAG si UAAP MVP Ben Mbala sa iyang interes nga moduwa sa iyang nasod nga Cameroon alang sa Fiba AfroBasket 2017 Qualifiers.

Ang kanhi import sa Southwestern University (SWU) Cobras nga kasamtangang nagduwa sa La Salle Green Archers sa Manila nahilakip sa 30-man national pool nga giporma ni coach Lazare Adingono.

Ang kasamtangang mga magduduwa sa National Basketball Association (NBA) nga sila si Joel Embiid sa Philadelphia Sixers, Luc Mbah a Moute sa LA Clippers ug Pascal Siakam sa Toronto Raptors mao ang nangulo sa listahan.

Gumikan sa maayong gipakita ni Mbala sa UAAP, giimbitar siya ni Adingono nga mo-tryout sa Cameeron national team.

Nagkanayon ang 6-8 nga magduduwa nga mismong si Adingono ang mitawag kaniya.

Matod ni M’bala nga mananghid siya sa La Salle ug UAAP kabahin niini.

“Yeah, why not? That will be a great learning experience for me,” matod ni Mbala sa interbyu sa Spin.ph.

“It feels great because it shows that all my hard work is being recognized.”

Gipasabot ni Mbala nga mapasigarbuon siyang giimbitar nga moduwa alang sa ilang national team.