KUNG gustoon gayud, nganong dili?
Nakita nako na kang LA Tenorio kon giunsa niya og sakwat ang iyang Barangay Ginebra Kings ngadto sa 108-97 nga kadaogan batok sa Alaska Aces atol sa PBA Philippine Cup quarterfinals niadtong Martes sa gabii, Pebrero 7.
Wala sila Greg Slaughter ug Joe Devance aron moabag anang tungora tungod sa mga injury.
Anaa lang kanila ang dughan ug ang kagustohan hinungdan nakab-ot nila ang kataposang silya sa semifinals aron atbangon ang Star Hotshots.
Gikinahanglan ni Tenorio moarte sa Kings. Nihuman siya og 31 puntos apan ang iyang pagmotibar sa iyang teammates maoy nipadaug kanila.
Niresponde sila Aljon Mariano, Dave Marcelo, Kevin Ferrer, Scottie Thompson ug Jervy Cruz sa awhag ni Tenorio sa ikaduha nga half.
Nakashagit ang usa ka loyal fan sa Ginebra nga si Alwin Saliring, usa sa mga reporter sa SunStar Cagayan de Oro, atol sa kadaogan sa Kings.
“Ganahan ko nila kay 'never say die' gyud sila,” butyag ni Saliring.
Gibura sa Ginebra ang twice-to-beat advantage sa Alaska, segundaan dayon sa eksklamasyon sa kataposan.
Paga-abrihon karong Huwebes ang ilang semifinal game tali sa Kings ug Hotshots sa alas 7 sa gabii.