NIPAGAWAS na ang Archdiocese of Cebu sa Oratio Imperata alang sa ulan kagahapong adlawa diin gamiton kini nga pag-ampo sa misa sa mga simbahang Katoliko subay gihapon sa nasinati sa nasod ug sa Sugbo nga huwaw.

Matod sa media liaison officer sa Archdiocese of Cebu nga si Msgr. Joseph Tan nga naghinayhinay na sila pagpahibaw sa mga simbahang Katoliko kabahin niini aron magamit na kini nga pag-ampo matag misa.

Posible nga karong Do­minggo na hingpit kini nga maampo ug ma­dungog sa publiko tu­ngod kay mao usab kini ang tingsimba sa mga Katoliko.

Dugang ni Tan nga usa kini ka pag-ampo nga matawag nga talagsaon tungod kay gikan kini sa mga hangyo sa nagkadaiyang sektor tungod usab sa kanihit sa supply sa tubig.

“One prayer nga pi­na­ngayo, requested sa kadaghanan,” si Tan nagkanayon.

Gihangop usab sa Metropolitan Cebu Water District ang maong pag-ampo tungod kay dako kaayo kini’g tabang sa problema sa kanihit sa supply sa tubig.

Matod sa tigpamaba sa MCWD nga si Charmaine Rodriguez-Kara nga nalipay sila nga gitubag ang ilang hangyo sa arsobispo sa Sugbo nga si Jose Palma aron usab makabaton gilayon og uwan ang Sugbo.

Susama sa MCWD gihangop usab kini ni Cebu City Mayor Michael Rama.

Matod sa mayor nga dugay na usab kini nga gipangayo ngadto sa sim­bahan ingon man nga giawhag niya ang iyang mga kawani diha sa city hall nga mag-ampo sa dali nga pagtapos sa weak El Niño.