GIIMBESTIGAHAN karon sa kapolisan ang giingong pagpanulis nga natigayon diha sa San Agustin Valley Homes ning dakbayan sa Cagayan de Oro.

Sa record sa Police Station 4 sa Carmen nahitabo ang insidente niadtong Martes sa gabii diin gisulod sa mga tulisan ang panimalay nga gipanag-iyahan ni Clark Dela Paz.

Giingong paingon na unta mangatulog ang magtiayon dihang sa pikas lawak misulod sa panimalay ang wala mailang suspetsado ug mideretso sa sala nga bahin.

Dihang lock na ang pultahan sa magtiayon giingong nanuktok ang suspek ug pag-abri ni Clark ug sa kahadlok nagsinggit og tabang hinungdan namusil kini diretso ug maayong pagkaigo sa biktima sa iyang baba nga bahin.

Human nakuha ang mga pipila ka mahalon nga gamit sa magtiayon misibat diretso ang suspetsado sakay og motorsiklo.

Gikakurat na lamang sa mga silingan ang hitabo ug daling gidala sa usa ka pribadong balay tambalanan ning dakbayan kinsa padayon pang giobserbahan sa mga doctor.

Ang kapolisan padayon pa sa imbestigasyon labina adunay silingan nakasulti nga gamayon nga lalaki ang suspetsado.