NIADTONG milabay nga adlaw, gipaatubang ngadto kang Presidente Rodrigo Duterte ang 228 ka mga giingong “police scalawags” sa Philippine National Police ug gipangkasab-an.

Gani moabot pa unta sila og 300 apan ang uban kanila wala na makasipot gumikan kay mitambong sa mga pagdungog sa ilang kaso ngadto sa korte samtang ang uban nag-absent without leave na sa trabaho.

Kon buot hunahunaon, kuwang ra kadtong pagsabon ni Presidente Duterte kanila tungod sa ilang pagkalambigit sa nagkadaiyang ilegal nga buhat samtang naa sa serbisyo.

Ang pagdisiplina kanila maayo nga lakang. Kay lisud kon mga pulis, maoy magpasiugda og binuang kay sila man ang gitahasan nga mo-implementar sa balaod.

Kon magpabadlong ang pulis, kinsa na man lang ang motuo nila, ilabi na kon manakop, nga sila mismo utro man pod dakpunon?

Busa angay lang nga unahon og disiplina ang mga pulis nga maoy mo-implementar sa balaod, una sila hatagan og katungod nga disiplinahon ang laing tawo diha sa katilingban.

Kinahanglan, mosugot man sila o di, magbuhat sila og maayo aron nga sundon kini sa katilingban.

Sa laktud, angay nga mahimo silang modelo sa kaayo diha sa katilingban.

Kon duna man silay kasal-anan, kinahanglan nga manubag sila niini o ba kaha taktakon sa serbisyo aron nga di na pamaresan.