SWERTENG naluwas sa tinong kamatayon ang usa ka sakop sa Bureau of Fire Protection (BFP) sa dihang gipusil sa suspek nga nag-atang kaniya sa ilang balay sa Barangay Cogon, dakbayan sa Digos, alas 11:45 sa gabii niadtong Martes, Pebrero 7.

Nailhan ang biktima nga si James Dalumpines, 50, minyo nga sakop sa BFP ug nadestino sa Barangay Aplaya sub-station sa dakbayan.

Gisulti sa imbestigador nga si Police Officer 3 Joie Pansan, nakauli na ang biktima sa ilang balay apan wala kini magdahom nga nag-atang kaniya sa tugkaran sa balay ang nag-inusarang suspek ug way daghang rason gipusil siya.

Apan maayo na lang sa tuong parte sa kamot naigo ang biktima ug daling gidala sa Digos Doctors Hospital diin gidapatan og medikasyon.

Human sa insidente, abtik nga misibat ang suspek padung sa wala matinong direksiyon.

Nagpadayon pa ang imbestigasyon sa kapulisan aron masuta ang motibo sa krimen ug mailhan ang suspetsado.