GIPOSASAN ang duha ka mga kawani sa gobyerno tungod sa pagpamaligya og shabu alas 11:45 sa buntag niadtong Miyerkules, Pebrero 8, sa Block 69, Pagatpat Street, Phase 2, SIR, Barangay 76-A Bucana, dakbayan sa Davao.

Ang Philippine Drug Enforcement Agency (PDEA) nag-ila sa mga dinakpan nga sila Rexford Irvin Pardillo, alyas Rex, 29, minyo; ug Mark Ugmad, alyas Mark, 33, minyo, pulos nagtrabaho sa nasyunal nga ahensya sa gobyerno.

Mga suspek gisikop human nagkonsabo sa pagbaligya og shabu nga nagkantidad og P3,000 ngadto sa nagtakuban nga buyer nga sakop sa PDEA.

Nakuha sa ilang posisyon ang upat ka pakiteng shabu ug marked money nga gamiton nga ebidensya sa kasong paglapas sa Republic Act 9165 kon Comprehensive Dangerous Drugs Act of 2002.

Si PDEA director Adzhar Albani nagsulti nga kini nagsilbing pahimangno sa mga empleyado sa gobyerno nga di moapil sa negosyo sa ilegal nga droga sanglit di sila magpanuko pagsikop kanila.

Giawhag sab sa opisyal ang katawhan nga motabang kanila aron hingpit nga masumpo ang droga sa nasud.